算牌
玩廿一點策畧一種 / From Wikipedia, the free encyclopedia
算牌(card counting),玩牌策畧一種,用喺賭博遊戲廿一點上面。玩家藉統計同概率,以祈打破莊家勝算。算牌有好多種計法,稱為算牌法,大柢為出過嘅牌畀分數,估計剩低落來嘅牌,勝算有幾大。算牌並唔係好難,熟手玩家基本上都會,所以廿一點為少數對玩家稍為有利嘅賭博。
算牌唔使記住出過嘅牌,但要一路玩,一路為出嘅牌計出總分,所謂流水數。一九八八年美國電影手足情未了,講算牌做記晒每一張牌,事實並唔係咁。套片亦誤導大眾算牌犯法[1]。
喺賭場算牌,視各地法例而定。只用心算,一段唔視為犯法。用另外方法記低同計算,甚至有專門機器,咁會視為出千,甚至視為犯法,然而並非處處法例都係咁。之不過,就算係心算,賭場唔歡迎依類玩家,會設法唔畀依類玩家賭廿一點,甚至禁止入場、打人同搶返彩金之類。
由於算牌容易,賭場有理冇理,只要贏得多都當算牌,話之有無算過,會趕人出場;亦有踩界嘅處理手法,例如捉人入房,嘥佢時間,名義上係詢問,實際上係禁錮。部分同黑社會關係密切嘅,重會用到違法手段。
除咗禁制同恐嚇手段,檯面上,賭場亦有一啲方法應付,改變原本遊戲玩法,如減少發牌次數,唔畀人加賭注,用好多副牌,唔用哂成副牌就重新洗過之類。故此玩家,亦會有相對唔同玩法嘅算牌法。
賭場亦可以靠現代技術,以電子洗牌出術,如記錄每隻牌,洗牌洗到有利於賭場先至發牌,甚至用機械逐張牌揀過先至出畀荷官轉發出去[2]。