穆家駿

穆家駿（（英文）MUK Ka Chun, Nicholas），香港親中陣營政黨民建聯，港區全國青聯委員^[1]，曾經參選2019年香港區議會選舉但畀民主派支持嘅候選人羅偉珊擊敗。

穆家駿 Muk Ka-chun，Nicholas
香港教聯會副主席
個人資料
出世	中國大陸
國籍	中國（香港） 英國國民（海外）
政黨	民主建港協進聯盟
其他政黨	香港培青社
居住地	香港
職業	教師
花名	穆Sir、穆嘴
學歷 培僑中學 香港中文大學社會科學學院

早年生活

穆家駿喺2003年入讀培僑中學，曾經做過學生會成員同埋辯論隊隊長，當時穆嘅政治取態已明顯親建制，佢喺2010年入讀香港中文大學社會科學學院，但係重不時出席同埋協辦校友會嘅活動。去到2013年畢業後，穆家駿返去培僑做教學助理，修讀教育文憑後正式成為通識科教師。^[2]

穆家駿喺接受訪問時，承認自己曾經攞過英國國民（海外）護照，但就形容噉樣自己只係英國嘅二等公民^[3]。

部分公職

• 灣仔區分區委員會(灣仔西)委員^[4]

政治參與同立場

身為民建聯同香港培青社嘅主要成員，穆家駿曾經多次以培青社嘅身份出席唔同「愛字頭」組織嘅活動，而培青社亦多次發表激進親建制同反日仇外民粹主義言論。穆本人亦曾經做過立場親共嘅教聯會網上電台HKFEEL嘅時政節目主持，又多次邀請保衞香港運動召集人傅振中擔任嘉賓^[2]。近年，佢亦不時發表批評以前西方國家殖民主義嘅言論^[5]。

香港政制議題

穆家駿主張跟從全國人大單方面定落，大幅度限制提名權同埋參選權嘅831框架，而且反對增加所有民選區議員成為提名委員會成員或當時其他親中派人士提出嘅『白票守尾門』折衷方案^[6]。穆家駿又支持《國歌法》立法，反對進行公開諮詢^[7]。

教育議題

喺國民教育議題上，穆主張增加中學教育當中強制修讀《基本法》嘅時數，^[8]而喺通識教育方面，佢接受內地媒體訪問嘅時候亦都話，就算通識教育嘅自由度高，但係喺一啲國家大是大非嘅問題上，老師唔可以立場含糊^[3]。

參與2019年香港區議會選舉

喺2019年香港區議會選舉，穆家駿接替黨友鄭琴淵^[9]，出戰本來鄭所屬嘅愛群選區，但畀民主派支持嘅候選人羅偉珊擊敗。 雖然區選敗部，但都可以喺第二年7月分到個分區委員會委員嚟做。^[10]

參與2020年香港立法會選舉

喺2020年香港立法會選舉，穆家駿本來獲提名為港島區立法會候選人張國鈞名單第三名，但香港政府後來以武漢肺炎疫情為理由，押後選舉一年。之後北京未經香港人同意，強行修改香港選舉制度，大幅度削減直選議席嘅比例。民建聯之後暫時未有公佈選舉安排。

參與2023年香港區議會選舉

2023年，穆家駿再度參選2023年香港區議會選舉，喺政府大幅度削減直選議席同排除民主派參選，三會委員可以互相提名都唔當有利害衝突嘅制度下，佢參選地區直選（灣仔）^[11]。穆家駿本身亦係工聯會成員，但同屬工聯會嘅吳秋北就並無支持佢，反而支持佢嘅競爭對手新民黨黃守東^[12]。

佢最終攞到6691票，成為灣仔區區議員^[13][11]。

言論同埋爭議

香港培青社言論

喺2016年1月，銅鑼灣書店東主李波懷疑被中共越境擄走，香港培青社喺Facebook發佈一則「李波先生與哪些性工作者來往」嘅「通緝令」，主席陳志興隨即畀部分網民批評，話佢轉移視線同埋人身攻擊。不過，穆其後畀人揭發身為副主席，影響力反而更加大。之後，有記者喺培僑中學門外等候穆家駿，穆家駿一概拒絕回應，期間佢仲話要報警，為咗擺脫記者追訪就算睇到有車駛過都照衝出馬路。^[14]

理工大學連儂牆風波

香港理工大學學生會喺雨傘運動四周年前夕，將民主牆嘅一半改成「連儂牆」。民主牆一直由學生會管理，但校方其後用紅紙冚（kam2）住牆上有港獨字眼嘅標語，又喺學生會所擬訂嘅民主牆守則上自行加上「釋義」，指學生會幹事會即係「理工大學學校發展處」，有學生不滿，抗議校方行動，^[15]穆家駿就避開民主牆本屬學生會管理或者大學自行釋義嘅問題，指責抗議嘅學生『迫使校方高層交出民主牆管理權』，不分是非黑白。^[16]

武漢肺炎疫情期間涉嫌唔恰當索取市民個人資料

武漢肺炎疫情期間，穆家駿同埋鄭琴淵被揭發喺2020年2月以派發口罩嘅名義，唔恰當索取市民個人資料。有市民前往穆家駿同埋鄭琴淵嘅辦事處領取免費口罩時，被要求出示身份證同埋住址證明，之後有關職員仲直接自行將佢嘅個人資料填喺一張選民登記表格上。有受訪市民話，現場好多長者根本唔知道職員填寫嘅係選民登記表格，就喺表格上簽名，前後至少有幾十份表格，而職員亦完全無提及選民登記嘅事。^[17]

東京奧運期間攻擊港隊成員伍家朗

内文：第32屆奧林匹克運動會同香港相關嘅活動事件 § 伍家朗波衫事件

2021年7月24號，正值東京奧運，穆家駿喺自己嘅Facebook專頁上，攻擊羽毛球港隊成員伍家朗，話佢著黑衫出賽，質疑佢係咪唔想代表中國香港出戰^[18]，並得到李梓敬嘅和應，李梓敬更加將矛頭指向伍家朗出賽時點解無著由另一贊助商FILA所提供，印有區徽嘅球衣。唔少網民，民主派人士，甚至部分親中派人士都批評穆家駿同李梓敬嘅言論。伍家朗回應事件，話自己無獲授權印區旗落去，又話自己一直以代表香港自豪，希望大家留意運動員表現，而唔係件衫度^[19]，佢又批評穆家駿「鬧還鬧，唔該搞清楚件事先鬧啦」^[20]。最終，伍家朗喺賽事落敗，有部分評論就認為，李梓敬同穆家駿令到當時嘅伍家朗，以致港隊其他成員嘅心理質素受到影響，係港隊落敗嘅元兇^[21]。

參考

1. 〈建黨百年愛國教育進校園理所應當（穆家駿）〉。www.hkfew.org.hk。原著喺2021-08-26歸檔。喺2021-07-26搵到。
2. 〈校友：直情以為培青社就係培僑校友會〉。原著喺2021-08-26歸檔。喺2020-05-22搵到。
3. 羊城派。〈教师节，为这些三观刚正的香港老师打CALL！「港明是非」〉 (簡體中文)。
4. 〈民政事務總署 - 我的社區 - 灣仔區 - 灣仔區分區委員會〉。www.had.gov.hk。喺2024-08-23搵到。
5. 〈穆家駿：西方抹不掉的不光彩紀錄〉。www.takungpao.com.hk。喺2021-07-26搵到。
6. 〈一位青年人對政改的意見書〉 (PDF)。原著 (PDF)喺2019-11-02歸檔。喺2020-05-22搵到。
7. 〈反駁《國歌法》本地立法的四大謬論〉。《文匯報 (香港)》。2018-05-17。原著喺2018-11-28歸檔。喺2020-08-09搵到。
8. 〈《學苑》謬論　港獨毒港〉 (PDF)。喺2020-05-22搵到。
9. 〈「90後」教師穆家駿　冀打造更和諧社區〉。《大公報》。2019-11-03。原著喺2019-11-09歸檔。喺2020-08-09搵到。
10. 〈99名建制區選敗部獲委任分區會 違慣例踢走區議員〉。《獨立媒體 inmediahk.com》 (繁體中文)。喺2023-11-14搵到。
11. 〈區議會選舉｜地區直選結果出爐　一文看清當選人名單〉。《明報新聞網》 (繁體中文)。喺2023-12-12搵到。
12. 星島日報 (2023-11-22)。〈區議會選舉．灣仔︱吳秋北撐新民黨 民建聯兼工聯成員穆家駿︰非常詫異〉。std.stheadline.com (中文)。喺2024-08-21搵到。
13. 潘耀昇鄭寶生 (2023-12-11)。〈區議會選舉結果全公布｜民建聯無法全取44席 宋芝齡落敗〉。《香港01》 (香港中文)。喺2024-08-21搵到。
14. 〈陳志興遭圍攻　培青社fb專頁關閉至今〉。原著喺2020-07-24歸檔。喺2020-05-22搵到。
15. 吳倬安 (2018-10-04)。〈理大連儂牆風波釀衝突　會長林穎恒預告開放日有行動抗議〉。《香港01》。原著喺2019-06-14歸檔。喺2020-08-09搵到。
16. 穆家駿 (2018-10-10)。〈理大學生會「絕食」實為播「獨」政治騷〉。《文匯報 (香港)》。原著喺2018-10-10歸檔。喺2020-08-09搵到。
17. 〈【武漢肺炎】攞口罩被登記做選民 居民質疑民建聯呃個人資料〉。《蘋果日報 (香港)》。2020-02-20。原著喺2020-07-24歸檔。喺2020-08-09搵到。
18. 〈強烈譴責羽毛球港隊成員伍家朗穿著沒有區旗標識的黑色衫代表中國香港出戰！！！！其他隊員參與混雙比賽都是穿著印有區旗的整齊隊服！如果不想代表中國香港，請選擇退賽！〉。《穆家駿 Nicholas Muk - Facebook》。2021-07-25。原著喺2021-07-25歸檔。喺2021-07-25搵到。
19. 〈伍家朗冀大家專注留意運動員表現而非衣服 - RTHK〉。news.rthk.hk (臺灣中文)。喺2021-07-25搵到。
20. 〈【東京奧運】黑衣作賽遭建制派狙擊 伍家朗：無球衣贊助 未獲授權印區旗 | 立場報道 | 立場新聞〉。《立場新聞 Stand News》。原著喺2021-07-25歸檔。喺2021-07-25搵到。
21. 《穆家駿 李梓敬 累 伍家朗輸波 黃世澤幾分鐘評論 20210728》 (英文)，喺2021-08-02搵到

睇埋

• 香港培青社
• 教聯會副主席