From Wikipedia, the free encyclopedia
眼（粵拼：ngaan5），又叫目（粵拼：muk6），係用來睇嘢嘅器官。眼其實係用來偵測光。唔同生物都有唔同嘅測光器官。最簡單嘅眼只可以知道周圍係光定暗，但係已經足夠幫生物根據日夜節奏去改變生體機能。[1]而複雜嘅眼就係生物特化出嚟光學結構，做出將光折射出到唔同位置、聚焦成影像、又或者控制有幾多光入到眼入面。以眼入面嘅感光細胞就會偵測到光，然後轉化做電訊號經神經傳到腦度。呢啲比較複雜嘅眼令到生物可以分到形同色，而百份之九十六嘅動物都有呢啲複雜嘅眼。[2]好多動物同人一樣，雙眼夾埋可以有三維視野。亦有一啲動物，雙眼各有各影像。脊椎動物嘅眼呈圓波形，叫眼球。
眼目二字，原本係講人眼，解有別。目講面上睇到嘅部份，而眼字係眼核，又叫眼珠。眼裏反映嘅人影，叫眼公仔或者瞳人。因為人好多時可以靠眼神嚟傳達情感，眼又俾人叫做「靈魂之窗」。
人眼運作嘅原理同相機好似。角膜同晶狀體因為有弧度，形成一組透鏡，作用就好似相機嘅鏡頭咁將光線聚焦，喺視網膜上面形成影像。虹膜就好似相機嘅光圏，可以透過改變瞳孔嘅大細嚟控制有幾多光可以入到眼球入面。視網膜負責將光轉化做神經訊號，經過視神經傳到腦度進一步分析，令到我哋睇到嘢。
現時所知嘅生物入面有十種唔同嘅眼結構[1]。佢哋最簡單可以分做有一層凹入去嘅感光細胞嘅單眼，同埋由好多細晶體夾埋一齊組成嘅複眼。人類嘅眼算係單眼，而昆蟲等嘅節肢動物就有複眼。
感知光嘅能力喺進化過程入面好早就出現[3]。而家普遍認為所有動物嘅眼係源自同一個最原始嘅感光組織。各種動物跟住為咗適應各自嘅環境而分別進化出唔同結構嘅眼。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
