武藏號
From Wikipedia, the free encyclopedia
武藏號係大日本帝國一艘戰列艦,第二次世界大戰時造,個名嚟自日本古代令製國名[1],係大日本帝國海軍聯合艦隊兩隻大和級戰船之中第二隻。大和級戰船,係世界上曾經建造過最大排水量同武器最勁嘅戰列艦。滿載排水量七萬二千長噸(七萬叄仟噸),裝備九支46釐米(18.1英寸)口徑主炮,副炮係四組三聯裝15.5釐米(6.1英寸)最上型重巡洋艦同款炮,船上載有六到七架水上偵察飛機。
![]() |
武藏號響1942年年中服役,下半年一直改裝成聯合艦隊嘅旗艦。1943年武藏號部署響Truk羣島同艦隊一齊搵美國軍艦,不過就乜都摷唔到。1944年嗰陣,佢有好幾次響日本本土同佔領島嶼之間運送兵力。同一年佢畀一隻美國潛艇用魚雷擊傷要返日本修理,響修理嗰陣,日本海軍順便加強咗佢嘅防空火力。響六月佢參加菲律賓海戰,不過就無遇到任何嘅美國戰船。1944年10月24號萊特灣海戰,武藏號畀美國航空載體艦飛機編隊懟冧沉入大海,一共中咗19條魚雷同埋17個炸彈。超過一半嘅船員獲救,佢嘅殘骸響2015年畀微軟公司聯合創辦人保羅艾倫(Paul Allen)請返嚟嘅搜索隊發現並且定位。