From Wikipedia, the free encyclopedia
武漢肺炎泰國疫情,係介紹2020年「武漢肺炎」喺泰國嘅爆發情形。泰國公共衛生部宣布確認咗國內首單感染個案,亦係中國大陸境外嘅頭單確診個案。截至2021年2月5號,泰國累計錄得22,058單確診個案,其中有79人死咗。
呢版要更新,以反映最新情況。加完料之後唔該拎走個模。 |
第一個確診患者係來自武漢嘅61歲女人,去泰國之前去過武漢嘅傳統街市,但係冇去過最初話有疫情湧現嘅華南海鮮市場[1] 。呢個女人喺入境新曼谷國際機場陣,被測到有高燒,而喺1月8號送院,化驗結果顯示對肺炎病毒呈陽性。泰國衛生部1月13號宣佈個案時,患者已逐漸康復,準備咁出院返去中國大陸[2]。
1月22號出現首單泰國籍人士嘅確診個案,病患係一73歲嘅女子,喺2019年尾去過武漢,呢陣時泰國嘅確診個案增至4單[3]。
1月31號通報頭次出現人傳人個案,新增4個來自湖北嘅旅客,1個係喺當地接載過佢哋嘅的士司機,未有去過中國大陸。呢日累計嘅個案增至19單[4]。
武漢宣佈咗封城後,當局喺2月4號派出咗包機,接返滯留當地嘅138個僑民,喺泰國時間晚7點到埠。其中六人因高燒而要送院治理,剩低嘅人就集中送咗去一處海軍基地度隔離兩個禮拜。而喺武漢仲有三個國民未撤走到,其中兩個學生有高燒,一個人嘅簽證就過咗期[5]。同日本土新增咗6單確診個案,包括一對啱由日本返國嘅情侶,唔清楚係外遊時定係返國先至受感染。另外兩個新個案都係接載過中國旅客嘅的士司機[6]。
3月以嚟個案出現咗猛增。事緣曼谷6號時,有過場吸引咗成5千名觀眾嘅泰拳盛事,跟著出現咗群聚感染,截至21號曼谷度3個泰拳館共有104個確診個案,泰國衛生部認為當日嘅賽事可能經已有至少500人受感染。[7]到3月22號宣佈新增188單確診個案,係泰國疫情爆發以來,單日最高新增。泰國衛生部發言人話,絕大多數個案多數係後生仔女,牽涉到曼谷當地一間拳擊館嘅群聚感染。而據報導,泰國嘅肺炎病例激增,同當地盛行嘅泰拳運動有好大關聯[8]。
類別 | 入院 | 死亡 | 好返 | 總數 |
---|---|---|---|---|
确诊個案 | 554 | 1 | 44 | 599 |
疑似個案 | 1,726 | 0 | 2,538 | 4,234 |
2月24號,當局將武漢肺炎列咗做危險傳染性疾病,政府部門可要求相關人士,必須喺發現疑似個案後嘅三個鐘以內通報,仲可以強制隔離病患,甚至去關閉某啲設施[11]。
3月3號當局再將口罩同含酒精嘅淨手噴霧,列做管制物品[10]。
曼谷市長安溫(Aswin Kwanmuang)喺3月21號宣佈,即日開始到4月12號為止,除咗超市外,曼谷嘅商場、拳擊館、美容院等冚巴拉都要閂22日,違規者可能面臨一年監禁,或罰十萬泰銖[8]。
首相巴育喺3月24號嘅電視講話度宣佈,由26號開始到4月30號,全國會實施緊急狀態以遏制疫情嘅蔓延。巴育話呢個決議,係內閣喺每禮拜嘅例會度一致通過嘅,會畀政府有更大權限去實施啲管控,例如可以去實施宵禁、審查媒體、驅散集會,仲有派部隊去執法。措施細節未有即時發佈,而巴育仲提醒民眾唔好非法使用社交媒體,同埋唔好囤積居奇,話咗會對違法者更嚴格咁執法[12]。另外仲會準備成立由總理做主席嘅經濟狀態管理委員會,由陸軍總司令指揮全國軍警去維持秩序[13]。人權觀察、反對黨等就質疑政府係借題發揮,因為呢個狀態下政府仲可以強化審查傳媒,兼可以去查封傳媒或個別物業等[14]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.