榴槤
From Wikipedia, the free encyclopedia
From Wikipedia, the free encyclopedia
榴槤（粵拼：lau4 lin4；學名：Durio zibethinus），又叫麝香貓果，係錦葵科榴槤屬植物。一般認為原產地喺泰國、馬來西亞、印度尼西亞、汶萊。目前泰國、越南、中國等都栽培[1]。
榴槤喺東南亞被譽為「果王」，榴槤與眾不同嘅地方係佢獨特嘅氣味以及外殼上嘅刺。榴槤果實可以成長到30厘米（12英寸）長，直徑15厘米（6英寸）。榴槤嘅形狀多數係長橢圓形或圓形，顏色係綠色帶啡色，果肉呈淺黃色。
呢個種係國際貿易上最常見嘅榴槤屬物種，人工栽培嘅品種已有成百樣。除咗本種，重有另外8種可食用嘅榴槤屬物種，多數只喺原生地嘅市場上出現。
呢一屬嘅植物係一種巨型嘅熱帶常綠喬木，原產東南亞，有「果王」之稱。原產地係汶萊、印度尼西亞同馬來西亞。亦有一啲人認為原產喺菲律賓。榴槤生長地遍佈東南亞佢主要生長喺泰國、馬來西亞、印尼等地，其他種植榴槤地方包括柬埔寨、老撾、越南、緬甸、印度、斯里蘭卡、西印度群島、佛羅里達州、夏威夷、巴布亞新畿內亞、波利尼西亞群島、馬達加斯加、海南島、澳洲北部同新加坡。
榴槤樹高15至20米。葉片長圓，頂端較尖，聚傘花序，花色淡黃，果實好似足球咁大，果皮堅實，密生三角形刺，果肉係由假種皮嘅肉包組成，肉色淡黃，黏性多汁，酥軟味甜，食起來有雪糕嘅口感。
榴槤營養豐富，100克榴槤含有熱量153卡路里、蛋白質2.6克、脂肪3.4克、糖類27.9克、維他命B 20.13毫克、維他命C 23.3毫克，重有好多微量元素，包括鉀。榴槤含豐富嘅雌激素可能增加女性嘅生育機會。
亞洲東南部早喺史前時代已食用榴槤，但西方世界認識榴槤得大概600年。已知歐洲最早榴槤嘅紀錄係意大利旅行家尼科洛·達·康提，喺15世紀前往東南亞時紀錄。葡萄牙醫生加西亞德奧爾塔（Garcia de Orta）喺1563年出版嘅書中描述榴槤喺印度當藥用。隨鄭和下西洋嘅馬歡喺《瀛涯勝覽》記述蘇門答剌國嘅榴連「賭爾焉[註 1]」：「有一等臭果，番名『賭爾焉』，如中國水雞頭樣，長八九寸，皮生尖剌，熟則五六瓣裂開，若臭牛肉之臭，內有粟子大酥白肉十四五塊，甚甜美好吃，中有子可炒吃，其味如栗。[2]」
榴槤係一種典型嘅熱帶生果，產地為泰國、馬來西亞等國。某啲品種嘅榴槤（例如生長喺馬來西亞嗰種）唔摘得，唔係就唔能夠繼續成熟，果樹亦會受損傷。只有等佢成熟後自己跌落嚟。榴槤樹種類眾多，有啲種四、五年就可以結果，有嘅要六到八年先能夠結果。絕大多數嘅榴槤樹每年結果一次，一樖樹每年可生產七、八十個榴槤。佢重有個奇特現象就係老莖生花，因為佢一個果大嘅重達1－2公斤，樹上細小嘅樹枝好難承受咁重，佢就喺主幹上開花結果。係適應環境嘅結果。一個榴槤樹掉下後不斷成熟嘅兩到四日，係最好味嘅，但經過五到六日後，大多數人會認為呢啲係爛熟又難食。
人類對榴槤嘅氣味有非常極端嘅嗅覺反映，有部分人認為非常芳香，鍾意食嘅人覺得好香，越食越鍾意，越食越上癮；而另一部分人認為惡臭無比。佢嘅籽亦可以食。一般好少有一種生果有咁明顯嘅嗅覺反差，但由於考慮到公眾反映，唔少國家好似泰國同新加坡嘅酒店、飛機同其他公共交通工具唔畀帶打開咗嘅榴槤。
成熟後自然裂口嘅榴槤，存放時間唔可以太耐，若果聞到有一股酒精味時，就係變咗質。未開口嘅榴槤，唔成熟嘅有一股青草味，成熟嘅散發出榴槤固有嘅氣味。
如果用手直接拎住榴槤食，手上嘅味道會殘留兩至三日，據講用榴槤嘅殼當容器盛水洗手，佢去除氣味嘅效果比用番梘洗手更好。
中國文學家郁達夫喺《南洋遊記》中曾寫道：「榴槤有如臭乳酪與洋蔥混合的臭氣，又有類似松節油的香味，真是又臭又香又好吃」[3]。
喺馬來西亞，榴槤嘅葉同根用來解熱，而葉汁用來醫發燒嘅病人。喺20世紀20年代，榴槤產品公司喺紐約推出咗一個叫「Dur-India」嘅保健產品，一打9美金，每個包含63片。
因榴槤含糖較高，因此，糖尿病患者唔應該食或少食，尤其食嗰時唔好飲酒。榴槤含鉀較高，所以有腎病、心臟病應小心食。榴槤性溫熱，故咽幹舌燥、喉痛乾咳、熱病體質、陰虛體質者應慎用。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
