日本嘅首都 From Wikipedia, the free encyclopedia
東京(日文:東京/とうきょう Tōkyō)亦都叫東京都,係日本嘅首都。東京係位於關東平原南部,對住東京灣嘅大都會。
以前東京叫江戶(Edo),15世紀已經建城。喺1868年明治天皇時期,日本遷都,由京都東遷德川幕府大本營江戶,江戶從此改名東京。
東京係日本嘅政治、經濟、文化、交通等各方面嘅中心。喺明治維新之後,吸引大量人搬到東京,都會範圍越來越闊,樓宇同其他城市相連。
東京都總面積有2193平方公里,包括23個特別區,26個市,5個町和8個村,同周圍嘅千葉縣、神奈川縣、埼玉縣三個縣構成「首都圈」。東京都目前大概有1403萬人口(相當於全日本嘅1/10),成個東京都會區(包括橫濱等週邊都市)總人口有成3727萬,係全球最大嘅都會區。
每日有幾百萬人由首都圈外圍地區去東京返工,令東京嘅市中心好繁盛,新宿、丸之內、日本橋等辦公大樓林立嘅區域聚集咗唔少上班族;到咗夜晚,新宿繼續人頭湧湧,其他人潮就轉咗去銀座、澀谷、六本木、台場等休閒娛樂場所林立嘅區域。
![]() |