杜卜勒效應
From Wikipedia, the free encyclopedia
杜卜勒效應(英文:Doppler effect),又叫多普勒效應,係一種關於波動嘅物理現象,講緊波源(一股波動嘅源頭)同觀察者有相對嘅郁動嗰陣,觀察者接收到嘅波頻率會同波源發出嘅波頻率唔一樣:如果波源係向住觀察者郁嘅,觀察者接收到嗰股波(同波源發出嘅波相比)頻率會高咗,而如果波源係離觀察者越嚟越遠嘅,觀察者收到嗰股波(同波源發出嘅波相比)頻率就會低咗。
杜卜勒效應呢個概念响物理學上頗為重要。有唔少聲學應用計數嗰陣,都要考慮埋杜卜勒效應嘅影響。除此之外,杜卜勒效應對宇宙學研究有所啟示——簡化噉講,天文學家分析由其他天體射嚟地球嘅光(光係電磁波一種),發現呢啲天體似乎多數都係離地球愈嚟愈遠嘅,而呢點係其中一項最重要嘅證據,被指係支撐咗「宇宙依家喺度膨脹緊」嘅學說。
杜卜勒效應呢一個現象最初係由奧地利物理學家杜卜勒喺 1842 年提出來嘅[1]。而喺 1845 年嗰陣,荷蘭化學家白貝羅畀一隊喇叭手企喺一架喺荷蘭烏德勒支附近駛過嚟嘅敞篷火車上面演奏,白貝羅佢喺月臺上面探測到音高嘅改變,確認咗杜卜勒效應呢個現象[未記出處或冇根據]。