From Wikipedia, the free encyclopedia
李華明,SBS,JP(Fred Li Wah-ming,1955年4月25號—),人稱「肥仔明」,社會工作者出身,香港立法會前議員,香港民主黨成員[1]。
早響1970年代火紅年代時,佢係香港大學生嘅托洛斯基派人物之一,同岑建勳、梁國雄等係戰友。所以,到1980年代中共響香港拉攏地方派系人物時,佢邀請佢出任觀塘民聯會嘅顧問,同當時任觀塘民聯會會長嘅前觀塘區議會主席兼牛頭角街坊福利會會長侯瑞培,以及前任民主建港聯盟立法會議員、當時嘅觀塘民聯會副會長陳鑑林並肩作戰。不過,佢亦曾經係香港民國派團體港九工團聯合總會顧問,因為當時觀塘東部嘅藍田(咸田新區)同油塘地區嘅反共勢力頗大[未記出處或冇根據]。
佢響1980年代尾加入咗泛民主派組織匯點,重當選為觀塘區區議員,一直連任至1994年。佢響1991年,同當時「香港民主同盟」嘅司徒華聯合響觀塘參選立法局成功。之後,因為主力立法局事務,佢冇再參選區議會,重響1995年立法局選舉中,喺九龍東南選區搫敗香港工會聯合會副秘書長譚耀宗連任,譚就由九龍東一帶轉往荃灣發展。
1999年區議會選舉,李華明跨區到觀塘區議會順天西選區參選,挑戰民主建港聯盟成員郭必錚,最後俾郭氏擊敗。反而佢助手何偉途、羅俊毅等人,就響四順其他選區成功進身觀塘區議會。
由1998年開始,李華明繼續伙拍民主黨黨友司徒華參選九龍東選區,成功連任立法會議員。李華明響2004年繼續連任,但喺民主黨元老司徒華退休後,只能保留九龍東選區一席,直到2012年唔再冧莊,佢話「從政冇退休保障」係佢離開嘅重要原因之一。
李華明早年係泛民主派嘅一員,但隨住2012年交棒畀黨友胡志偉之後,佢嘅言論就開始向親中陣營走。
例如,喺2021年中共未經香港人同埋泛民主派同意,修改香港選舉制度之後,唔少泛民主派都認為要杯葛選舉,但係李華明就話,泛民主派唔應該封死參選之路,甚至支持設立資格審查委員會篩選候選人[2]。之後,佢甚至接受親中派堅料網旗下嘅《堅雜誌》訪問,話北京希望民主黨參選,又公開反對劉慧卿形容新制度要泛民主派向選委請求提名係屈辱嘅說法[3]。呢個說法引起唔少迴響,例如媒體WinandMac以『正式投共』形容李華明[4],時事評論員黃世澤就提出要求民主黨踢佢出黨[5]。不過,《蘋果日報》之後亦引述不記名民主黨黨員,報道話李華明其實對民主黨嘅影響力非常有限,新一代有新一代嘅諗法。係咪參選嘅決定,關鍵仍然係整個政治大環境同埋民主黨支持者點睇[6]。
2022年1月,佢因為未經民主黨批准,以個人名義力撐黨外立法會候選人狄志遠參選第7屆香港立法會選舉嘅社會福利界功能界別,畀民主黨紀律委員會提出凍結黨籍半年,佢接受紀委聆訊時,雖然承認違規,但認為只係做自己認為啱嘅事。民主黨中央委員會將會喺2022年2月開會,投票決定係咪採納紀律委員會嘅建議,凍結佢嘅民主黨黨籍半年,上訴期有一個禮拜;佢表示唔會提出上訴,但就考慮係咪退黨[7]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.