曹操

曹操（「操」可讀「粗」或「燥」音；155年—220年），字孟德（maang6 dak1），沛國譙縣（安徽省亳州市）人^[1]，細個時嘅乳名叫阿瞞（aa3 mun4），有一個名叫吉利（gat1 lei6）^[2]，係東漢末年出名嘅軍事家、政治人、文學家，三國時代魏國嘅奠基人同埋主要締造者。

曹操
曹操像
東漢 魏王、丞相、冀州牧
生	155年
死	220年
繼任	曹丕(魏王、丞相、冀州牧)
仔女	曹昂、曹丕、曹彰、曹植、曹熊、曹沖等
遞啲名
字	孟德

生平

早年

中平元年(184年)，東漢爆發咗黃巾之亂，嗰時擔任騎都尉嘅曹操奉朝廷嘅命令，到潁川鎮壓。平定亂事後嘅佢升做濟南相，係任內打擊當地嘅貪官同埋邪教^[3]。後尾漢靈帝駕崩，宮廷係經過一連串嘅混亂後，由西涼嚟嘅軍閥董卓專權，曹操由於睇唔慣董卓擅自廢帝嘅暴行而走咗去陳留^[4]，然後用晒啲家產係當地招兵買馬^[5]，聯合其他諸侯組成討伐董卓聯盟，但係聯盟最終因為諸侯內訌而解散，曹操亦都因為係榮陽之戰中損失慘重而去淮南募兵^[6]

征戰中原

初平三年(192年)，曹操平定兗州嘅盜賊，自立做兗州刺史，並且趕走咗朝廷委派嘅兗州刺史金尚^[7]。到咗195年，曹操已經喺兗州鞏固成一個勢力。董卓被王允同呂布謀殺後，佢嘅手下李傕同埋郭氾推翻咗王允嘅統治，並且趁機控制政府^[8]，之後兩人為咗爭權奪利而互相攻打，漢獻帝趁亂逃離長安，進入安邑^[9]。曹操聽從軍師荀彧嘅建議，迎接獻帝，獻帝俾咗曹操錄尚書事^{[註 1]}嘅權力。之後，曹操又聽從董昭嘅建議，將都城由洛陽搬去許昌^[10]。曹操之後係建安三年(198年)消滅割據徐州嘅呂布^[11]。第二年，割據淮南嘅袁術病死，領土被曹操兼併。曹操係消滅中原嘅其他軍閥後統一咗中原^{[註 2]}，並且開始同北方嘅軍閥袁紹爭奪天下。

統治北方

建安五年（200年），曹操喺官渡同河北嘅袁紹展開官渡之戰，最後曹操贏咗，第二年再度打敗入侵嘅袁紹，激到袁紹一病不起，喺建安七年（202年）病死^[12]。曹操喺之後嘅7年內平定咗成個河北，嗰陣嘅曹操已成為最強嘅諸侯。建安十三年（208年），曹操自立做丞相^[13]，並且喺同年嘅七月南征荊州^[14]，同年八月，荊州牧劉表病死，佢個細仔劉琮投降^[15]，曹操因此攞到成個長江以北嘅荊州地區。雖然曹操睇嚟就嚟統一天下，但佢喺赤壁之戰輸咗畀孫權同埋劉備，令到佢統一天下嘅機會就咁冇咗。建安十六年（211年）七月，曹操開始遠征西涼^[16]，平定嗰頭嘅馬超同韓遂等軍閥，馬超逃往漢中，而韓遂就俾部下殺害，曹操係第二年班師回朝^[17]。自嗰陣時開始，曹操統一咗中原北部嘅大部分地區。佢喺213年自封為魏公，216年自封為魏王，最後喺220年死咗^[18]，諡號係「魏武王」，佢個位由佢嘅二仔曹丕繼承，曹丕篡位後追尊曹操為「魏武帝」。

身後

後事

曹操離世之後，佢個仔曹丕繼承佢魏王、丞相、冀州牧之位^[19]。同年十月廿九日，曹丕篡漢，逼漢獻帝退位禪讓俾自己，建立曹魏，年號黃初，定都洛陽。佢封咗劉協做山陽公^[20]，並且追尊曹操為太祖武皇帝。

墓葬

曹操死之後葬咗喺高陵^[21]，高陵係2009年12月俾人搵到。

屋企人

祖父輩

• 曹騰（100年－159年），東漢宦官，曹操阿爸曹嵩係佢嘅養子。
• 曹褒，潁川太守，曹仁嘅阿爺。

父輩

• 曹嵩（？－193年），曹操嘅老竇，宦官中常侍、曹丕稱帝之後，追尊曹嵩為太皇帝。
• 曹熾，侍中、長水校尉。曹褒個仔，曹仁、曹純阿爸。
• 曹鼎，尚書令、河間相、吴郡太守。曹洪嘅伯父，曹休嘅阿爺。

細佬

• 曹德（？－193年），同佢老竇曹嵩被陶謙嘅人殺。
• 海陽哀侯，唔知佢名，佢個女嫁夏侯淵個仔夏侯衡。
• 曹彬，曹操個仔曹均嘅養父。
• 曹操細佬，唔知佢名，佢個仔係曹安民。
• 曹操細佬，唔知佢名，佢個女嫁畀孫堅個仔孫匡。

堂兄弟

• 夏侯惇（？－220年）：字元讓，係曹操嘅最信嘅人。
• 夏侯淵（？－219年）：字妙才，夏侯惇嘅族弟，老婆係曹操嘅原配夫人丁氏個妹。佢個仔夏侯衡娶曹操細佬海陽哀侯個女。
• 曹仁（168－223年）：字子孝，太祖嘅從弟。
• 曹純（170－210年）：字子和，曹仁細佬。
• 曹洪（？－232年）：字子廉，太祖嘅從弟。

妻妾

曹操正妻同側室，可以搵《魏志·后妃傳》同《武文世王公傳》，有十五位被記載：

• 丁夫人，曹操嘅原配正室夫人，曹昂死之後就離異。
• 武宣皇后，卞氏，有曹丕、曹彰、曹植、曹熊四個仔。
• 劉夫人，曹操嘅妾，早年病死，生有曹昂、曹鑠兩個仔，女係清河公主。
• 環夫人，曹操嘅妾，有三個仔曹沖、曹據、曹宇。
• 杜夫人，曹操嘅妾。同前夫秦宜祿有個仔秦朗。同曹操生仔曹林、曹袞，女係金鄉公主。
• 秦夫人，曹操嘅妾，生有曹玹、曹峻二個仔。
• 尹夫人，曹操嘅妾。同前夫何咸生仔何晏，同曹操生仔曹矩。
• 王昭儀，曹操嘅妾，曹幹嘅生母陳妾早死，曹操畀王昭儀養佢。
• 孫姬，曹操嘅妾，生仔曹上、曹彪、曹勤。
• 李姬，曹操嘅妾，生仔曹乘、曹整、曹京。
• 周姬，曹操嘅妾，生仔曹均。
• 劉姬，曹操嘅妾，生仔曹棘。
• 宋姬，曹操嘅妾，生仔曹徽。
• 趙姬，曹操嘅妾，生仔曹茂。
• 陳妾，曹操嘅妾，生仔曹幹。
• 張濟嘅老婆，張繡嘅族叔仔嘅老婆，成咗曹操嘅側室之後被張繡憎。
• 來鶯兒，野史記載，東漢雒陽嘅名妓，後來鍾意曹操嘅侍衛王圖。

仔

據《魏志·文帝紀》、《任城陳蕭王傳》、《武文世王公傳》，曹操有25個仔，佢哋係按照著佢老母嘅地位排列，唔知佢哋嘅年齡順序：

• 曹昂（？ - 197年），劉夫人大仔，曹操嘅庶大仔，但係畀曹操原配丁氏養大。
• 曹丕（187年 - 226年），卞皇后嘅大仔，魏文帝。
• 曹彰（？ - 223年），卞皇后嘅二仔，又叫「黃鬚兒」。
• 曹植（192年 - 232年），卞皇后嘅三仔，叻文學。
• 曹熊（？ - ？），卞皇后嘅細仔，早死。
• 曹鑠（？ - ？），劉夫人嘅細仔，早死。
• 曹沖（196年 - 208年），環夫人嘅大仔，著名神童，13歲早死。
• 曹據（？ - ？），環夫人嘅二仔。
• 曹宇（？ - 278年），環夫人嘅細仔，魏元帝曹奐嘅老竇。
• 曹林（？ - 256年），杜夫人嘅大仔。
• 曹袞（？ - 235年），杜夫人嘅細仔。
• 曹玹（？ - ？），秦夫人嘅大仔，早死。
• 曹峻（？ - 259年），秦夫人嘅細仔。
• 曹矩（？ - ？），尹夫人嘅獨生仔，早死。
• 曹幹（214年 - 261年），佢生母陳氏過身後，被王夫人養大。
• 曹上（？ - ？），孫姬嘅大仔，早死。
• 曹彪（195年 - 251年），孫姬嘅二仔，之後同王凌謀反失敗，被賜死。
• 曹勤（？ - ？），孫姬嘅三仔，早死。
• 曹乘（？ - ？），李姬嘅大仔，早死。
• 曹整（？ - 218年），李姬嘅二仔。
• 曹京（？ - ？），李姬嘅仔，早死。
• 曹均（？ - 219年），周姬嘅獨生仔。
• 曹棘（？ - ？），劉姬嘅獨生仔，早死。
• 曹徽（？ - 241年），宋姬嘅獨生仔。
• 曹茂（？ - ？），趙姬嘅獨生仔，同曹操、曹丕唔啱。

女

曹操嘅女，考証到嘅有6位：

• 曹憲（？ - ？），漢獻帝貴人。
• 曹節（？ - 260年），漢獻帝皇后。
• 曹華（？ - ？），漢獻帝貴人。
• 安陽公主（？ - ？），唔知佢名，荀惲嘅老婆。
• 金鄉公主（？ - ？），唔知佢名，尹夫人或杜夫人個女，何晏嘅老婆。
• 清河公主（？ - ？），唔知佢名，夏侯楙嘅之老婆。

另外《昭明文選》陸機《吊魏武文》李善嘅注引《魏略》話：太祖杜夫人生沛王豹及高城公主。唔知高城公主同金鄉公主係唔係同一個人。

侄輩

• 曹安民，曹操嘅侄仔。
• 曹休（？－228年）：字文烈，太祖嘅族仔。
• 曹氏，曹操細佬海陽哀侯（佚名）個女，嫁畀夏侯衡。
• 曹氏，曹操嘅侄女，嫁畀孫匡。

養仔

曹操嘅養仔，考証到嘅有3位：

• 曹真（？－231年）：字子丹，老竇係曹邵，一係姓「秦」。
• 秦朗（？－？），曹叡嘅近臣。生父係秦宜祿，被張飛殺死。老母係曹操嘅妾杜夫人。
• 何晏（?－249年），大將軍何進嘅孫，曹操嘅女婿，三國時期嘅玄學家。老竇何咸早死，老母係曹操嘅妾尹夫人。

後裔

• 曹霸：高貴鄉公曹髦嘅後人，唐玄宗嗰陣嘅畫家，得書文得畫畫，官至左武衛將軍。
• 曹雪芹：《紅樓夢》嘅作者。

參攷

引用

1. 《三國志·魏書一·武帝紀》：太祖武皇帝，沛國譙人也，姓曹，諱操，字孟德，漢相國參之後。
2. 《曹瞞傳》：太祖一名吉利，小字阿瞞。
3. 《三國志·魏書一·武帝紀》光和末，黃巾起。拜騎都尉，討潁川賊。遷爲濟南相，國有十餘縣，長吏多阿附貴戚，贓污狼藉，於是奏免其八；禁斷淫祀，姦宄逃竄，郡界肅然。
4. 《三國志·魏書一·武帝紀》：卓到，廢帝爲弘農王而立獻帝，京都大亂。卓表太祖爲驍騎校尉，欲與計事。太祖乃變易姓名，間行東歸。
5. 《三國志·魏書一·武帝紀》：太祖至陳留，散家財，合義兵，將以誅卓。冬十二月，始起兵於己吾
6. 《三國志·魏書一·武帝紀》：太祖兵少，乃與夏侯惇等詣揚州募兵
7. 《魏略·卷六》：金元休名尚，京兆人也……獻帝初為兗州刺史，東之郡，而太祖已臨兗州。尚南依袁術。
8. 《三國志·魏書一·武帝紀》：司徒王允與呂布共殺卓。卓將李傕、郭汜等殺允攻布，布敗，東出武關。傕等擅朝政。
9. 《三國志·魏書一·武帝紀》：是歲，長安亂，天子東遷
10. 《三國志·魏書一·武帝紀》：天子還洛陽……太祖遂至洛陽，衞京都，暹遁走。天子假太祖節鉞，錄尚書事……洛陽殘破，董昭等勸太祖都許。
11. 《三國志·魏書七·呂布臧洪傳》：建安三年……太祖自征布……太祖塹圍之三月，上下離心，其將侯成、宋憲、魏續縛陳宮，將其衆降……布與其麾下登白門樓。兵圍急，乃下降。遂生縛布……於是縊殺布。布與宮、順等皆梟首送許，然後葬之。
12. 《三國志·魏書六·董二袁劉傳》：自軍敗後發病，七年，憂死。
13. 《三國志·魏書一·武帝紀》：十年春正月……漢罷三公官，置丞相、御史大夫。夏六月，以公爲丞相。
14. 《三國志·魏書一·武帝紀》：秋七月，公南征劉表。
15. 《三國志·魏書一·武帝紀》：八月，表卒，其子琮代，屯襄陽……九月，公到新野，琮遂降
16. 《三國志·魏書一·武帝紀》：秋七月，公西征
17. 《三國志·魏書一·武帝紀》：十七年春正月，公還鄴。
18. 《三國志·魏書一·武帝紀》：二十五年……庚子，王崩于洛陽，年六十六。
19. 《資治通鑑.卷六十九.魏紀一》漢帝尋遣御史大夫華歆奉策詔，授太子丞相印、綬，魏王璽、綬，領冀州牧。
20. 《資治通鑑.卷六十九.魏紀一》十一月，癸酉，奉漢帝為山陽公
21. 《資治通鑑·卷六十九·魏紀一》丁卯，葬武王於高陵。

註釋

1. 錄尚書事嘅大臣先至可以處理尚書臺(東漢最高權力機關)嘅業務，而且地位仲高過尚書臺最高嘅長官尚書令，所以無論你嘅職位係乜，只要你有咗錄尚書事嘅職位，你就可以享有最高嘅權力。
2. 呢度嘅中原泛指黃河以南、淮河以北同埋潼關以東嘅廣泛地區。

前任： 董卓	漢朝丞相 208年—220年	繼任： 曹丕