暴風雪號航天飛機

暴風雪號航天飛機（俄文：Буран，ГРАУ正式編號11Ф35 К1）係蘇聯製造嘅一架航天飛機，亦都係暴風雪計劃裡面唯一投入使用過嘅航天飛機。喺1993年暴風雪計劃被俄羅斯當局腰斬之前，暴風雪號淨係進行過一次無人飛行^[1]。

搭載暴風雪號航天飛機嘅能源號火箭

搭載暴風雪號航天飛機嘅安-225運輸機

設計

暴風雪號航天飛機嘅設計，同美國嘅穿梭機相似，但係亦都有兩個重要差異：

1. 美國嘅穿梭機將主引擎裝喺穿梭機上面，外接一個巨大嘅燃料箱。但係暴風雪號就將主引擎裝徂喺負責發射嘅能源號火箭（俄文：Энергия）上面，飛機上面褪出來空間用來裝輔助引擎。因此，暴風雪號降落嘅時候，就算第一次著陸唔成功，都可以用輔助引擎推動重飛、兜個圈、調整姿態再著陸多次，而美國嘅穿梭機著陸就只能夠一次成功；
2. 美國嘅穿梭機採用垂直運輸，運到發射塔之後可以好快升空。而暴風雪號採用水平運輸，運到發射塔之後重要戙起身先至可以升空，無美國嘅穿梭機咁方便。

歷史

暴風雪號航天飛機紀念郵票

1970年代年代末期，蘇聯認為美國極有可能用穿梭機運載同投放核武器，於是決定開發自己嘅航天飛機作為回應。中央機械製造研究院（俄文：Центральный научно-исследовательский институт машиностроения，縮寫「ЦНИИМаш」）受命主導蘇聯航天飛機嘅研發，而軍方亦都從其他設計局調徂一批設計師過去幫手。計劃嘅代號係「暴風雪」，除徂航天飛機本身之外，亦都負責研究運載火箭同專用運輸機，成果分別有能源號火箭同埋安-225運輸機。

1988年11月15號UTC凌晨3點，暴風雪號航天飛機喺哈薩克嘅拜哥努勒發射場升空，執行無人操縱試飛任務^[2]。喺用徂206分鐘圍著地球飛徂兩圈之後，暴風雪號喺拜哥努勒發射場嘅跑道自動著陸。雖然當時嘅側風達到每秒17米，但係暴風雪號淨係向側超出預定停機位置3米，向前淨係超出10米^[2]。當時，發射嘅錄影帶只有一小部份被人公開徂，而公開嘅部份亦都拍攝唔到發射嘅真實情況，於是有人質疑暴風雪號根本無發射到，淨係被安-225帶徂上天然後飛徂返發射場——當年美國嘅企業號穿梭機亦都係恁樣試飛嘅。為徂平息疑慮，蘇聯當局決定公開全部錄影，證明暴風雪號真係發射徂^[3][4]。蘇聯傳媒重話當時天氣好惡劣^[3]。

之後蘇聯當局曾經計劃喺1993年再用暴風雪號進行一次無人飛行，預計會喺太空停留15到20日^[5]。但係蘇聯解體之後，俄羅斯聯邦航天局腰斬徂成個暴風雪計劃^[5]。

參考

1. "Buran". NASA. 1997年11月12號. 原著喺2006年8月4號歸檔. 喺2006年8月15號搵到.
2. Chertok, Boris (2005年)。Asif A. Siddiqi (編)。《Raketi i lyudi （火箭與人類）》 (PDF)。NASA History Series。頁 179。喺2006-07-03搵到。
3. 〈影片：蘇聯穿梭機暴風雪號升空〉。vunet.ru。原著喺2006-11-08歸檔。喺2006-09-13搵到。
4. 唔同角度拍攝嘅暴風雪號升空畫面
5. "Экипажи "Бурана" Несбывшиеся планы". buran.ru. 喺2006-08-05搵到. （俄文）