From Wikipedia, the free encyclopedia
普拉塔河豚(Pontoporia blainvillei),又叫做拉河豚(Franciscana,阿根廷,烏拉圭叫法)、Toninha(巴西人叫法)、Cachimbo、拉布拉他河豚等,分布喺南美洲東南面嘅大西洋海域。分類上佢係屬於河豚(河海豚)嗰類。係唯一住喺海嘅淡水河豚,不過都係比較鍾意住喺沿岸淡水海域。
普拉塔河豚係拉河豚科裏面唯一嘅品種。Paul Gervais同Alcide d'Orbigny喺1844第一次描述呢類海豚,種名blainvillei係由法國動物學家亨利(Henri Marie Ducrotay de Blainville)改。
雖然普拉塔河豚係鯨豚類中其中一種最細條品種,但佢嘅咀係所有海豚之中最長(同體型相比)只係幼豚比成年嘅短好多。公身長大約1.6米,乸就有1.8米長。全身灰啡色。頭細,眼睛細,噴氣孔呈弦月狀,頸部有皺紋。背鰭好似脊骨咁伸延到尾部。肚嘅顏色比背脊淺色啲。尾末端好尖,中間凹位好明顯。
初生BB體重7.3至8.5公斤,成年嗰陣30-53公斤。懷孕期約10至11個月,5歲左右可以交配。有活到20歲嘅記錄。
目前已知嘅分布地係巴西嘅多瑟河,向南穿越烏拉圭,至阿根廷。最南邊嘅記錄係阿根廷嘅瓦爾德斯半島。但而家已經好少見。
人對普拉塔河豚嘅認識好少,因為佢哋嘅外型唔突出,性格又孤僻,唔容易俾人發現。只知佢係唯一會住響海邊嘅淡水海豚。大多數嘅目擊記錄都係響水深9米內,近陸地嘅地方。冬天好難見,有可能有季節性遷徙行為。1條或者5條一齊遊,游水好慢,浮上水面呼吸嗰陣只係露出好少身體。
一般會避開船隻,佢哋有可能係喺海床度搵魚,魷魚同蝦嚟食。咁長嘅咀亦有可能用嚟勃開,甚至拔走海草嚟搵食。天敵係殺人鯨同某幾種鯊魚(例如七鰓鯊)。見到佢哋時,呢類河豚就會停留喺海面或者貼近海面,郁都唔郁。
普拉塔河豚屬於極度瀕危品種,因為漁網纏身令到佢哋大量死亡。雖然烏拉圭喺1970年代有大量捕殺依類河豚嘅記載,但呢十幾年嚟最嚴重嘅地區係巴西同埋阿根廷。