旺角嘴

旺角嘴，舊時寫望角嘴^[1]，原本叫芒角嘴，係香港一地，亦係一嘴，喺今下九龍旺角嘅西面。大概係山東街同砵蘭街一帶。

地理

望角嘴原本係兩涌口中間嘅地方來嘅，一條係東北望角村流入來，而另一條係東南何文田村流入。兩水積成沙嘴。後尾涌水等地貌，經已沒喺樓房屋宇之下不復見。涌口約莫係今下近新填地街、奶路臣街同山東街之間一帶。

望角嘴東北係望角村，背靠有山仔，高一百卅三呎，因此水向望角嘴流。望角山仔向海邊突出，北面檔住望角嘴，望角或者因此叫角。

史

英國人得到九龍半島無幾耐，就將半島西岸大幅填海，由南而北，首先係尖沙嘴，然後油蔴地。望角嘴呢帶仍係鄉郊，田陌處處。

一八八七年，油蔴地差館街，近岸穿田，伸到去望角嘴。當其時就諗住喺望角嘴，填直海皮，逐少發展。

一九零二年，望角嘴同油蔴地市區，都早已連成一氣。而大家填地岸，亦遠離差館街，而望角嘴市區向北伸近望角。差館街亦向北伸，經望角、九龍塘、田寮、元洲，駁去大埔道。條街亦有支路，去大角嘴、塘尾、深水埗等地。

地名沒落

因為係填地嘅關係，而旺角重係鄉村，所以旺角嘴早過旺角發展。後尾旺角都發展埋，人就易將旺角同旺角嘴混淆。一九四七年重有旺角嘴個地名，一九六四年，旺角嘴亦不復見。旺角嘴都變咗旺角，旺角嘴有旺角碼頭。原本早早有嘅旺角嘴街市，轉名做旺角街市^[2]。旺角嘴呢個名亦都畀人遺忘。

註

1. 《香港華字日報》，光緒二十一年歲次乙未正月十五日，有新聞題叫《澤及旅人》，內文係「對海九龍，英屬等處，已建蓄水池，便民汲取，約本年底准可一律告竣，屆時尖沙嘴、油麻地、望角嘴、紅磡一帶，均有自來水洵洵，取之不窮，用之不竭矣。」原文無標點，家下加返方便讀。
2. 香港法例132AO