數碼電路
From Wikipedia, the free encyclopedia
數碼電路(粵拼:sou3 maa5 din6 lou6,英文:Digital circuit),又或者叫數碼集成電路,係指用數碼方式嚟傳達訊號嘅電子電路;相對於用模擬方式傳訊嘅模擬電路[1][2]。研究「點樣設計數碼電路」嘅電子學子領域,就係所謂嘅數碼電子學(Digital electronics)。
數碼電路係廿一世紀初電腦同電訊嘅重要根基:喺概念上,一吓數碼訊號由一個離散(discrete)物理量集建構成,表示一連串離散嘅數值-吓數碼訊號嘅一個可能數值(例如 0)同下一個可能數值(例如 1)之間實會有個最細嘅可能差距,冇話斬件到幾細都得,例如數值冇得係 0.5;呢種訊號喺廿一世紀初嘅數碼電腦同各種電子架生當中好常用-呢啲機械會傳一串串由有電(1)同冇電(0)組成嘅訊號,並且用呢一串串嘅數值表示一啲資訊,用唔同嘅 1-0 組合代表唔同嘅符號,例如 0000 表示英文字母 A,0001 表示字母 B... 呀噉,達致「用連串電流傳達信息」噉嘅效果[3][4]。
喺實際應用上,數碼電路可以搵邏輯門(logic gate)等嘅電子元件砌出嚟。响廿一世紀初,數碼電路可以話無處不在咁滯,電腦、智能電話[5]以至遊戲機[6]等嘅科技產品都會用到數碼電路,而數碼電子學亦自然成為咗電子工程等領域上嘅必備知識之一。