From Wikipedia, the free encyclopedia
快捷通軌道(英文:Rapid Rail),即為巴生谷輕快鐵系統,係一個服務馬來西亞巴生谷(包括雪蘭莪同吉隆坡)嘅城市軌道交通系統,依家營運緊嘅路線包括三條輕快鐵線路(安邦線、大城堡線、格拉那再也線)同一條單軌鐵路(吉隆坡單軌列車),四條路線加埋一齊總長度大約159.2公里(98.9英里)。[2]快捷通軌道系統由馬來西亞國家基建公司擁有,同由佢全資子公司快捷通軌道私人有限公司(英文:Rapid Rail Sdn Bhd)營運,屬於吉隆坡快捷通(Rapid KL)品牌名稱旗下嘅公共交通服務之一,而旗下另一項公共交通服務係快捷通巴士(Rapid Bus)。快捷通軌道(以「吉隆坡快捷通」為名)、馬來亞鐵道、機場快鐵(ERL)同巴生谷捷運系統組成巴生谷嘅公共運輸鐵路網。輕快鐵採用標準軌,而單軌就採用ALWEG型軌道。列車營運時間由朝早6點至夜晚11點或者12點左右[3],繁忙時段平均每3分鐘一班車,非繁忙時段最耐14分鐘一班車[4]。
馬來西亞經濟發展由1980年代開始突飛猛進,令到首都吉隆坡機動車數量同道路交通流量不斷增加;加上馬來西亞政府採取扶持國產汽車工業嘅政策,令到馬來西亞成為國民汽車擁有率最高嘅東南亞國家。根據馬來西亞政府喺1980年代初進行嘅吉隆坡總體交通規劃,預測2000年首都私家汽車數量將會比1980年增加2.8倍,當局有必要改變交通政策同提高公共交通嘅比重,否則吉隆坡未來不得不面對嚴重嘅交通擠塞,所以嗰個規劃報告建議喺吉隆坡市中心形成以城市軌道交通為主、公共汽車為輔嘅交通運輸系統。
1990年,由馬來西亞同外國公司組成嘅聯合體完成吉隆坡輕軌系統(LRT)嘅可行性研究,建議借鑒香港同新加坡起地鐵嘅經驗,並優先上馬從市中心通往東南方向、連接安邦同冼都嘅輕軌鐵路。1992年,輕軌運輸系統私人有限公司(Sistem Transit Aliran Ringan Sdn Bhd)由9間公司合股成立,負責呢條輕軌鐵路嘅建設同經營,所以呢條路線亦得名為「STAR」(實達輕快鐵,依家叫安邦線)。實達輕快鐵一期工程全長12.1公里,由安邦站至蘇丹依斯邁站,喺1993年8月完成融資協議並正式動工,至1996年12月起完通車。呢條線係馬來西亞第一條輕軌鐵路,軌道採用1,435毫米標準軌距,牽引供電制式為750伏特直流第三軌供電;由德國AEG公司(後來嘅Adtranz)同英國Taylor Woodrow分別作為機電同土木工程承建商;投資模式為BOO模式(建設-擁有-經營)同土地補償,以配合當時馬來西亞政府嘅公用事業民營化政策。實達線二期工程包括北延線(蘇丹依斯邁站至冼都東站)同南延線(陳秀連站至大城堡站),兩條延線都喺1998年起完通車。喺2016年7月,大城堡線延長線正式通車。依家,安邦線被拆分做兩條路線,分別係安邦線同大城堡線。
1993年,為配合將喺吉隆坡舉行嘅1998年英聯邦運動會,馬來西亞政府決定喺吉隆坡起第二條輕快鐵鐵路,於是成立輕軌運輸合作項目私人有限公司(Projek Usahasama Transit Ringan Automotif Sdn Bhd),嚟負責第二條輕快鐵線路嘅實施,所以呢條路線亦得名為布特拉輕快鐵(Putra LRT)(依家叫格蘭那再也線)。布特拉輕快鐵全長29公里,喺吉隆坡市內由東北向西南延伸,連接鵝嘜同格蘭那再也,途徑雙子塔同吉隆坡塔等出名地標。布特拉輕快鐵嘅投資模式為BOT模式同土地補償,喺1994年2月正式動工,第一階段(格拉那再也站至中央藝術坊站)喺1998年9月起好通車,第二階段(中央藝術坊站至鵝嘜站)喺1999年6月起好通車。呢個係啟用當時係世界上營運里程最長嘅全自動無人駕駛輕軌系統,亦係全球第四個龐巴迪先進快速軌道交通系統(ART),採用直線電機驅動嘅無人駕駛列車、750伏特直流第三軌供電、「SelTrac」CBTC移動閉塞系統。喺2016年7月,格蘭那再也線延長線正式通車。
1996年,馬來西亞政府批准興建吉隆坡單軌列車(KL Monorail)計劃,呢項計劃最初曾經被叫做旅客捷運系統(PRT)。呢條跨坐式高架單軌鐵路全長8.6公里,串連吉隆坡中央車站交通樞紐同市中心金三角地帶。呢條採用BOT模式興建嘅單軌鐵路喺1993年8月正式動工,由吉隆坡基建集團(KLIG)擁有40年嘅特許經營權,機電同土木工程承建商原本係日本日立公司,但係1997年亞洲金融風暴後因融資困難而暫停工程;1998年改由本國企業「MTrans」公司(而家史格米鐵路公司)繼續完成工程,至2003年8月建成通車,總共耗資11億8000萬令吉。
但係,上述三條城市軌道交通路線起完通車之後,三間輕軌鐵路同單軌列車營運商都面臨嚴重財政困難,主要原因係基礎建設同車輛購置費用等固定投資嘅債務償還壓力,而且客流量水平亦遠低過建設規劃時估計。由於吉隆坡私家車擁有比率好高,加上政府缺乏對泊車設施同接駁交通等配套規劃,令到好多吉隆坡市民仍然習慣使用私家車出行,阻礙咗城市軌道交通系統使用率嘅提高。以安邦線為例,嗰條線最初預計到2003年嘅日均客流量將達到50萬人次,但實際只係達到11萬人次。另外,城市軌道交通系統建設規劃上不足亦備受批評,由於三條路線分別由三間公司各自營運而互不隸屬,當呢幾條路線落成時並無統一嘅轉乘車站,令到乘客轉乘另一條路線好麻煩。
2001年11月,馬來西亞聯邦政府不得不負起最後承擔者嘅角色,接管呢兩間頻臨破產危機嘅輕軌鐵路營運公司,由企業債務重組委員會(CDRC)負責對佢哋進行債務重組,當時呢兩間公司合共仲有57億令吉(大約合16.1億美元)未償還債務。之後,為咗加強整合吉隆坡公共交通系統、提升公共交通嘅營運效率同服務質素,馬來西亞聯邦政府喺2004年7月注資成立吉隆坡快捷通公司(RapidKL),作為馬來西亞國家基建公司(Prasarana)嘅子公司,由2005年1月1號開始成為吉隆坡嘅公共交通營運商,負責經營巴生谷輕快鐵鐵路同巴士服務[5]。2007年5月,營運單軌列車嘅吉隆坡基建集團因無能力償還巨額貸款而宣佈破產,並喺同年11月由馬來西亞國家基建公司收購吉隆坡單軌列車。自此,安邦線、格拉那再也線、吉隆坡單軌列車構成咗巴生谷輕快鐵系統[6]。
2011年,吉隆坡快捷通公司推出叫自動售檢票系統(AFC)嘅綜合票務系統,畀乘客可以喺自動售票機購買代幣式車票,只需一個代幣即可以通行所有輕軌同單軌鐵路嘅車站;而持有「一觸即通卡」(Touch'n Go)或者「我的快捷卡」(MyRapid Card)嘅乘客,可以直接喺驗票閘機上拍卡同進出車站。自動售檢票系統喺2011年11月開始喺輕軌車站開始使用,並喺2012年2月開始擴展至所有單軌列車車站[7][8]。2013年1月,馬來西亞國家基建公司宣佈進行企業架構重組,建立快捷通軌道公司(Rapid Rail Sdn Bhd)經營原本由吉隆坡快捷通公司營運嘅鐵路服務,建立快捷通巴士公司經營原本由吉隆坡快捷通公司營運嘅巴生服務[9]。
2018年由一觸即通公司同支付寶合作研發嘅Touch n go電子錢包開通咗乘車碼服務,依家處於試運營階段,適用於部分車站,用戶可以喺Touch n go公司申請,即可以體驗呢項服務。
路線名 | 通車日期 | 車站數目 | 線路長度 | 起訖車站 | |
---|---|---|---|---|---|
3 安邦線 | 1996年12月16號 | 38[10] | 45.1 公里 | AG18 安邦 | AG7 蘇丹依斯邁站 |
1998年12月6號 | AG7 蘇丹依斯邁站 | AG1 冼都東站 | |||
2016年7月17號 | AG11 陳秀連站 | AG18 安邦站 | |||
2016年12月1號 | AG18 安邦站 | AG1 冼都東站 | |||
4 大城堡線 | 1998年7月11號 | SP1 陳秀連站 | SP8 大城堡站 | ||
2015年10月31號 | SP8 大城堡站 | SP12 金鑾第五區站 | |||
2016年3月31號 | SP12 [[金鑾第五區站 | SP17 公主鎮站 | |||
2016年6月30號 | SP17 公主鎮站 | KJ37 SP21 布特拉高原站 | |||
2016年7月17號 | KJ37 SP21 布特拉高原站 | SP11 冼都東站 | |||
5 格拉那再也線 | 1998年9月1號 | 37[11] | 46.4 公里 | KJ24 格拉那再也站 | KJ14 中央藝術坊站 |
1999年6月1號 | KJ14 中央藝術坊站 | KJ1 鵝嘜站 | |||
2016年6月30號 | KJ37 SP21 布特拉高原站 | KJ1 鵝嘜站 | |||
8 吉隆坡單軌列車 | 2003年8月31號 | 11[12] | 8.6 公里[12] | MR1 KJ15 吉隆坡中央車站 | MR11 SP9 蒂蒂旺沙站 |
9Kajang Line | 2016年12月16號 | 31[13] | 51 公里[13] | SBK01 KA08 雙溪毛糯站 | SBK14 士曼丹站 |
2017年7月17號 | SBK14 士曼丹站 | SBK35 KB06 加影站 | |||
合計 | 116[註 1] | 159.2 公里 |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.