廣州南站
From Wikipedia, the free encyclopedia
廣州南站(粵拼:gwong2 zau1 naam4 zaam6)係一個喺廣州市嘅火車站,位置喺番禺區鐘村鎮石壁村,係個大型現代化嘅鐵路客運站。距離廣州市嘅中心17公里,喺2004年12月30號動工興建,2010年1月30號局部啟用。
廣州南站係武廣客運專線三個始發站之一,亦係廣深港高速鐵路、廣珠城際軌道交通、貴廣鐵路、南廣鐵路嘅交匯點,重通過三眼橋聯絡線連接廣州站同廣州東站。廣州南站建成之後,取代咗而家廣州站嘅主導地位,並將會同廣州站、廣州東站重有廣州北站共同形成中國鐵道部規劃嘅全國鐵路六大客運中心之一——廣州鐵路客運樞紐。預計去到2020年客運發送量達8014萬人次。
廣州南站亦係廣州市內一個綜合交通樞紐,旅客可以喺站內直接轉高鐵、地下鐵、巴士、的士等交通工具。廣州地鐵2號線、7號線、20號線、白鵝潭聯絡快線同埋佛山地鐵2號線等地鐵線都會喺廣州南站地底或者附近設地鐵站,形成一個集中嘅公共運輸交匯處。