From Wikipedia, the free encyclopedia
阿歷西·尤里耶域治·尼莫夫(俄文:Алексей Юрьевич Немов;1976年5月28號—)係一位退役俄羅斯體操運動員,職業生涯一共攞到12面奧林匹克運動會獎牌,包括四面金牌。
2000年係尼莫夫第二次參加奧運會。今次佢一個人攞到6面獎牌,包括兩面金牌、一面銀牌同三面銅牌。喺男子全能決賽裡邊,尼莫夫同中國嘅楊威展開徂激烈嘅對決,最後尼莫夫以0.113分嘅微弱優勢獲勝,贏到佢職業生涯含金量最大嘅全能金牌[1]。
2000年悉尼奧運會之後,尼莫夫狀態開始下滑,但係俄羅斯奧委會重係決定派佢作為「穩定軍心」嘅老將出戰2004年雅典奧運會。由於尼莫夫跳馬同全能都入唔到決賽,因此男子單槓決賽就成為徂佢嘅告別演出。喺爾場男子單槓決賽裡邊,尼莫夫做出徂直體特卡切夫、分體特卡切夫、直體特卡切夫、京格爾、槓上轉身、團身後空翻兩周連續六個空翻動作,祇係落地嗰陣無企穩向前跨徂一步。但係裁判就打出令人震驚嘅9.725分,引發全場觀眾發出震耳欲聾嘅噓聲,導致比賽中斷超過5分鐘。後來裁判迫於觀眾壓力,將尼莫夫嘅得分升高到9.762分,但係由於尼莫夫重係會攞唔到獎牌,所以全場噓聲依然持續,直到尼莫夫親自出馬請觀眾安靜,啲觀眾先至安靜到落來。
由於嗰場比賽之前已經發生過幾次類似嘅打分爭議,包括之前南韓選手梁泰榮(양태영)指控裁判將佢嘅技術分打低徂,同埋美國選手保羅·咸(Paul Hamm)喺跳馬總決賽裡邊墮地照攞冠軍嘅事件,國際體操聯合會迫於壓力而對打分系統進行徂重大改革。新嘅打分系統喺2006年生效,鼓勵選手喺比賽裡邊做更高難度嘅動作,同時改進徂打技術分嘅標準[2]。雖然尼莫夫之前話過想征戰埋北京奧運,但係喺2004年雅典奧運之後佢都係退徂役,退役之前俄羅斯奧委會獎徂面象徵性嘅金牌,同埋40000美金嘅獎金畀佢[3][4]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.