小食
From Wikipedia, the free encyclopedia
小食[註 1]係一種口味上具有獨特風格嘢食總稱,可以作為正餐以外之間嘅零食,亦可以係早餐、宵夜嘅主要嘢食。世界各地都有當地特色嘅風味小食,鮮明特色往往亦係當地觀光行銷嘅重點,以及所有遊子對於家鄉思念嘅「主要對象」。小食價錢平,一般人都買得起。有啲學者更將小食作為一種文化嘅現象研究。
有啲小食講求製作時間短或者可以儲存比較長時間,隨時都可以食,唔使好似煮正餐咁蹝時間。有啲中式小食由於取材比較普遍,好快流行到其他地區;但有啲小食由於口味獨特或者只係用當地材料,只可以局限喺一個地區。現代由於人口流動大,材料運輸方便,好多原本局限喺一個地區嘅小食,迅速向各地擴散。著名小食就靠口耳相傳而同大眾文化緊密交纏,甚至可能成為當地代表嘅飲食。
但係,小食發展到而家,喺一啲地區已經有咗另一種意思。雖然一樣係講究採用當地新鮮嘅食材,但喺製作方法繁複、作工講究,比講究飽肚嘅正餐更為繁瑣,係追求利潤嘅餐廳未必會賣。呢種小食,已經係一種地道飲食文化,絕非只係喺三餐之間填飽個肚,追求醫餓肚嘅層次。