From Wikipedia, the free encyclopedia
女性車廂(粵拼:neoi5 sing3 ce1 soeng1),係火車或地下鐵入面,專門為女仔而開設嘅車廂。
而家喺全球各地凈得日本、印度、伊朗、埃及、巴西、印尼、馬來西亞同阿聯酋、臺灣、菲律賓馬尼拉、南韓首爾、釜山、俄羅斯莫斯科搞咗呢啲制度。 目的係防止車廂入面出現鹹豬手。
女性車廂可以細分做女士優先車廂同女士專用車廂兩種:
日本喺1912年1月31號最先搞女性車廂,但實施無耐因反對聲比較大而停咗[1]。雖然隨後輾轉到關西地方搞,但得好少成效而喺1937年廢除[2][3][4]。但1947年5月因為解決車廂入面出現鹹豬手、賣淫等一系列性犯罪行為而重新恢復[5],雖然1973年8月15號到1980年代尾冇用過呢種車廂,但1980年代尾因為性暴力犯罪頻發而重新引入[6]。
雖然日本當地法律有規定凡係男仔誤入女性車廂嘅,嗰位男仔要罰錢,但實際操作係靠自覺同工作人員勸導為主。
喺印度,由於人口太多及引起一系列性騷擾、全裸、性侵犯等一系列性侵犯行為[7],國內有規定凡係長途嘅火車都有女性車廂。尤其喺孟買,冚唪唥城鄉及市區啲地鐵同火車嘅每個車廂間隔都係嘅女性車廂[註 1];喺德里嘅地鐵亦有提供凈畀女仔上車嘅列車[8]。
國內任何形式嘅地鐵同火車都有保安睇住有冇男仔誤入女性車廂,若果有男仔誤入女性車廂,保安會第一時間夾硬捉男仔落車同罰250文印度盧比[9]。
喺耶加達,從2010年8月開始喺市區公眾場合(包括巴士同地鐵)猛咁收到同性騷擾有關嘅案例,喺2012年10月1號整咗部紫紅到粉紅色調之間嘅女性專用列車畀女仔上車[10]。但直到2013年5月為止,因為收到個案話嗰啲女性列車喺高峰時段,出現有男仔踏入女性列車及高峰時段未完全體現到「女性專用」效果而停用[11]。
馬來西亞曾經爆發過好多單公共場合嘅性騷擾個案。從2010年開始,馬來西亞鐵路部門開始引入以粉紅色調為主,專畀女性用嘅列車或車廂[13]。
喺開羅地鐵,由於爆發咗好多單男仔侵犯女仔嘅鹹豬手同性侵犯嘅個案,地鐵部門喺1989年開始劃出女性車廂範圍[註 2][14]。
喺臺灣,從2006年6月1號開始實施女性車廂制度,但實施後3個月內因成日出現男女撈埋入車廂,加上冇相關罰則而停用[15][16]。直到2010年5月底,因為屏東縣爆出咗第一單性侵犯個案而宣佈從同年月30號開始,喺高峰時段,通勤列車第一節車廂重新恢復返女性車廂制度[17]。
喺南韓,首爾喺1992年試過喺地鐵1號綫同國鐵搞女性車廂制度[18],但無耐因為太多男仔上女性車廂而停用。雖然喺2007年由議會提出重新開返女性專用車廂嘅建議,但好快被打回頭[19],直到2011年9月喺2號綫重新用返呢個制度[20]。釜山從2016年6月22號開始,每日上落班高峰時段[註 3]喺地鐵1號綫搞女性車廂試點[21][22],到同年9月19號為止,因為地鐵方話有好多市民讚成用女性車廂而正式喺成個釜山地鐵推廣呢個制度[23]。
2006年4月,喺里約熱內盧實施咗一系列針對女性權益嘅法案,喺地鐵高峰客流時段[註 4],都會有地鐵安保睇住有冇男仔誤入女性車廂或女性等車區範圍[24]。
喺聖保羅地鐵,曾經喺1995年10月到1997年9月實施過女性車廂制度,但有好多結咗婚啲夫婦話呢項制度有性別歧視而取消咗[25]。
喺德黑蘭地鐵,從1999年開始營運1號綫之後,冚唪唥路線都整咗女性車廂制度[26][27]。位置喺列車第一、二同最後一架車廂。
喺杜拜地鐵,當地為咗打擊車廂內鹹豬手問題,從2013年9月開始將列車嘅半數車廂加咗女性車廂制度,限喺高峰時段用[註 5],2015年2月25號開始將女性車廂擴大到每隔車廂間隔範圍[29]。
英國曾經喺1874年10月嘅維多利亞女王時代搞過女性車廂制度直到1977年3月廢除為止[30]。雖然1999年有提議搞返女性車廂制度,2014年9月亦提出過同樣理由[31],但一直冇下文。
喺俄羅斯,凡係長途火車每車廂間隔都有女性車廂制度。目的係嚴打色狼同變態佬,鹹豬手。喺莫斯科,地鐵從2006年8月開始,學以前倫敦同印度啲地鐵噉將部分車廂整咗粉紅裝飾嚟做女性車廂[32]。
喺馬尼拉輕軌,當地正式考慮到全國有5%人口信回教同加強女性保護措施[33]而喺2002年開始將列車頭兩節車廂整成女性車廂[34][35]。
雖然中國鐵路部門從2006年2月7號開始喺Z5/6次、Z21/22次京滬直達特快列車3號軟臥車廂嘅兩個床鋪包厢整成女仔專用,但一個禮拜後因為太少人用而取消咗[37][38][39]。雖然2015年3月,北京同上海喺京廣/京深、滬廣/滬深嘅床鋪動車搞女賓專用包房,但呢啲飛冇得喺線上賣,凈得通過傳統賣飛嘅方式先至有[40]。
地鐵方面,由於部分有地鐵啲城市出過好幾單變態佬、麻甩佬偷拍女仔裙底同鹹豬手行為,喺廣東,深圳地鐵喺2017年6月初提出搞女性車廂制度[41],同年月26號喺1、3、4、5號綫正式搞試點[42]。廣州地鐵喺2017年6月23號正式決定從同年月28號開始,每個禮拜一到五上落班高峰期喺1號綫搞女性車廂試點[43],重喺2017年12月28號開通嘅13號綫開搞女性車廂制度[44]。
喺深圳,地鐵實施咗女士優先車廂制度半個月之後,發現有好多男乘客誤入女性車廂嘅情況。同年7月28號,廣州地鐵實施咗女性車廂一個月後,女性車廂範圍喺平時得好少男乘客響度。而高峰期亦有時出現一堆趕時間啲男乘客誤入女性車廂情況。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.