From Wikipedia, the free encyclopedia
大白鯨超級運輸機(正式編號空中客車/SATIC A300-600ST)係歐洲空中客車工業以A300客機為基礎改造而成,主要用來運送飛機半成品嘅特種運輸機[1]。
大白鯨超級運輸機雖然名義上係A300-600R嘅衍生機型,但係除徂機體底部同主翼之外,其他所有部份都重新設計過:為徂裝得落廣體客機(例如A330同A340)嘅半成品,國際特殊飛行器運輸公司為爾種超級運輸機設計徂一個圓筒形嘅超大機身;而為徂配合超大機身帶來嘅空氣動力狀況,設計師加大徂超級運輸機嘅垂直尾翼同水平尾翼,重喺水平尾翼嘅末端加裝徂垂直安定面,以增加飛行穩定性。
空中客車係歐洲飛機製造商聯合組建嘅企業,因此空中客車飛機嘅部件,係先由分散喺歐洲各地嘅廠房組裝成半成品,然後再運到法國圖盧斯或者德國漢堡嘅總裝廠房道進行總裝嘅。空中客車早期試過用公路或者鐵路運輸爾啲半成品,但係成本高不但止,效率亦都好低。於是喺1972年,空中客車由美國太空總署接收徂四架「超級彩虹魚」運輸機,專門用來空運半成品。
到徂20世紀90年代,空中客車接到嘅生意越來越多,但係四架超級彩虹魚運輸機就日益老化,已經越來越跟唔上空中客車嘅需求。於是空中客車決定開發一種自己嘅超級運輸機。同為空中客車成員企業嘅法國宇航集團同德國戴姆勒-奔馳航太集團共同組建徂一間子公司「國際特殊飛行器運輸公司」(英文:Special Aircraft Transport International Company),專門負責研發同製造爾種新飛機[3]。設計完成之後,由西班牙飛機製造公司負責製造機身底部同垂直尾翼、德國易北飛機製造廠負責製造貨艙、英國咸保航空結構集團同德國多尼亞飛機製造廠負責製造機頭嘅一體成型掀罩式貨門、法國立迪哥耶夏飛機製造廠負責製造駕駛艙、法國芝隆德軍機維護及保養集團負責最後總裝[3]。第一架新飛機喺1992年9月開始製造,1994年9月第一次試飛,喺經過徂335個鐘頭嘅試飛之後,喺1995年10月25號獲得法國政府嘅適航證書[2],1996年1月投入商業運營[3]。由於新飛機嘅外型好似一條白鯨,所以好快有徂「大白鯨」爾個花名。
喺大白鯨一號機得到適航證書之後,空中客車又先後製造徂四架大白鯨超級運輸機。為徂更有效恁運營爾五架超級運輸機,喺1996年,空中客車將國際特殊飛行器運輸公司改組為「空中客車國際運輸公司」,除徂運輸飛機部件同半成品之外,重開始對外提供貨運包機服務[4],先後運輸過貨船化學品儲存罐[5]同國際太空站補給模組[6]等超大件貨物。其中最出名嘅一次任務係1999年受命運送盧浮宮博物館嘅鎮館之寶之一,法國畫家歐振·德拉古魯華嘅畫作《自由引導人民》去日本東京國立博物館展出[7][8]——為徂慶祝今次非凡嘅任務,空中客車特登將放大徂嘅《自由引導人民》噴徂係執行今次任務嘅大白鯨三號機機身兩邊[8]。
空中客車國際運輸公司原本預計:全球各地重需要起碼20架大白鯨來滿足運輸超大件貨物嘅需求。可惜嘅係,大白鯨運輸機雖然載貨量把炮,但係偏偏航程唔夠長,飛歐洲各國無乜問題,但係就跨越唔到任何一個大洋,於是喺五號機出徂廠之後,爾種超級運輸機就無再收到過任何訂單。而大西洋另一邊嘅死對頭波音集團亦都照版煮糊,以波音747貨機為基礎製造徂四架波音747-400夢幻運輸機,主要用來運輸波音787客機嘅機身部件。
2014年7月,空中客車宣佈將會以A330-200F貨機為基礎,結合A330-300嘅部份設計,研製新一代嘅大白鯨超級運輸機「大白鯨XL」[9]。新嘅大白鯨XL唔單止有更大嘅貨艙,重會重新設計包括機尾同垂直安定面在內嘅好多個機身組成部份[10]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.