地球科學
From Wikipedia, the free encyclopedia
地球科學(粵拼:dei6 kau4 fo1 hok6;英文:earth science)係一個涵括性嘅詞語,泛指所有(主要用物理同化學嘅角度)研究地球嘅科學領域[1][2]。佢嘅各個領域會好似其他科學家噉用科學方法去了解地球嘅各種物理同化學特性-佢哋會係噉諗啲理論出嚟嘗試去解釋佢哋研究嘅現象,再諗吓呢啲理論會唔會作出一啲預測,再用實驗同觀察等嘅方法去驗證呢啲理論,唔啱嘅理論就會改或者唔要。
地球科學嚴格上嚟講算係行星科學(Planetary science;研究行星嘅科學)嘅一個專門分支,但係地球同其他行星比起上嚟零舍多人研究。噉係因為佢對於人類嚟講係一粒好特別嘅行星:佢係目前唯一已知有生命存在嘅行星,而係仲係智人(Homo sapien)嘅屋企。
地球科學嘅範圍好廣,涵括咗地質學、海洋學、氣象學、同天文學等嘅領域,而且佢柞子領域又好多時會跨越幾個科學領域:例如係研究地球嘅岩石圈嘅地質學就會試圖了解地殼嘅化學成份同埋由地核放出嚟嘅熱力點樣影響呢啲成份-前會涉及化學,而後者會涉及熱能同壓力呢啲概念(即係物理學嘅範疇)。總體嚟講,地球科學係一個好綜合性嘅科學領域。