From Wikipedia, the free encyclopedia
嗣聖(嗣讀字,粵音:zi6 sing3;684年1月23日—684年2月27日),係唐中宗李哲(哲讀折,粵音:lei3 zit3)[註 3] 第一次在位嗰陣所改嘅唯一年號[註 4],用咗兩個月都唔夠。因為嗰個年號用嗰陣由皇太后武則天臨朝稱制,攞住實際大權,所以有尐史書話佢係武則天嘅年號[註 5],但係大部分史書重係寫佢做李哲嘅年號[註 6]。呢個年號淨係用咗1個月又6日(嗣聖元年二月初六,684年2月26號)。跟住,唐中宗就因為一句戲言而俾母后武則天捉住把柄廢咗去,第二日(即係嗣聖元年二月初七,684年2月27號)唐高宗李治個細仔李旦登基,改元文明,嗌唐睿宗,而「嗣聖」年號跟住就廢咗。
「嗣聖」年號嘅廢止同「文明」年號嘅建立,標誌住武則天「聖衷獨斷」嘅時代開始,「則天朝」亦隨之開始[註 7]。
弘道元年十二月初四丁巳日(683年12月27日),天皇(唐高宗)李治喺洛陽洛陽宮貞觀殿駕崩。過咗兩日,即弘道元年十二月初六己未日(683年12月28日),皇太子李哲喺先帝靈柩前即皇帝位,是為唐中宗,尊天后武氏為皇太后。
弘道二年正月初一甲申日元旦(684年1月23日)改元嗣聖。嗣,代表繼承;聖,聖人、聖王、聖帝,指先帝唐高宗;「嗣聖」即係繼承先帝遺志嘅意思。
弘道二年春正月初一甲申日元旦(公元684年1月23號),改年號做嗣聖,大赦天下。立太子妃韋氏做皇后,將韋皇后個老豆[註 8]韋玄貞嘅職位由普州(治所喺而家四川省安岳縣)參軍提升做豫州(治所喺而家河南省汝陽縣)刺史。
正月初十癸巳日(684年2月1日),任命散騎常侍韋弘敏[註 9] 做太府寺卿[註 10](九卿之一)、同中書門下三品(就同宰相級別差唔多),接替喺舊年十二月三十除夕(684年1月22日)被炒魷魚嘅宰相郭正一。
同一年,杞王兼沔州(治所喺而家河北省武漢市漢陽區)刺史李上金、鄱陽郡王李素節同埋義陽公主、宣城公主兩個公主知道父皇高宗嘅訃告之後,喺外地趕嚟東都洛陽[註 11]奔喪。左武衛將軍檢校[註 12]左羽林將軍黑齒常之升官做左武衛大將軍。
唐中宗想將國丈韋玄貞再將豫州刺史升官做侍中(門下省長官、宰相中嘅第二位),重想封自己個乳母個仔做五品官。中書令(中書省長官、首席宰相)裴炎據理力爭,堅持認為唔可以。激到中宗好嬲,同左右侍臣講:「我就算將成個天下讓畀韋玄貞,又點啫?!唔通就稀罕一個侍中嘅位咩?!」[註 13] 裴炎好驚,走咗之後將呢件事同太后禀報,兩人定下咗廢黜中宗、另立新帝嘅計劃。
嗣聖元年二月初六戊午日(公元684年2月26日),太后去到東都洛陽嘅皇宮正殿——洛陽宮乾元殿,召集百官。裴炎同原北門學士成員中嘅三人——中書侍郎劉禕之、左驍衛大將軍檢校左羽林將軍程務挺同右領軍大將軍檢校右羽林將軍張虔勖率兵入去大殿,宣佈太后嘅命令,廢中宗做廬陵王,將廢帝扶落殿。廢帝問:「我有咩罪?」太后答佢:「你想將天下讓畀韋玄貞,點會無罪?」[註 14] 於是將廢帝囚禁喺第二處,而啱啱做皇后嘅韋氏亦都廢埋,家屬更被發配嶺南。第二日,武太后立佢個細仔李旦為帝,佢就係睿宗,改元文明,「嗣聖」年號被廢止。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.