古典芭蕾舞
From Wikipedia, the free encyclopedia
古典芭蕾舞(英文:classical ballet)係建基於傳統芭蕾舞技巧同詞彙嘅嗰一套芭蕾舞,亦都係最廣為人知嗰一種[1][2]。古典芭蕾舞最明顥嘅藝術特徵有以下呢啲[3]:
- 重視流暢優美嘅動作;例:舞蹈員要用特定嘅腳位同步行方法(即係所謂嘅「古典式行走」)嚟連接唔同嘅舞步。
- 偏好修長嘅線條;例:做阿拉伯斯卡舞姿(Arabesque)嗰陣要將隻抬起髀伸到直一直,令個舞蹈員嘅膊頭去腳板成一條長嘅線。
- 講求對稱性;例:喺一班舞蹈員一齊團隊跳舞嗰時,佢哋企嘅位置會成對稱嘅圖形。
- 喺舞步上有好嚴謹嘅規範;通常一場古典芭蕾舞表演入面嘅舞段(pas)冚唪唥都係由古典芭蕾舞嗰柞基本舞步砌出嚟嘅,所以喺學古典芭蕾舞嗰陣,老師會要求學生學曉完美噉做每一個古典舞步[3]。
古典芭蕾舞可以按照地區分做法國式、意大利式、英格蘭式、同俄羅斯式等多派。好多時,每一款古典芭蕾舞都有佢自己獨有嘅教法,而英國皇家舞蹈學院(The Royal Academy of Dance)用嘅嗰套教法係最廣受探用嘅(香港同中國大陸啲芭蕾舞老師多數都係用呢套嘅)。皇家舞蹈學院嗰套結合咗意大利式、法國式、同俄羅斯式嘅教法,形成咗英格蘭式呢種獨有嘅一種風格,為全世界嘅芭蕾舞教育制定咗標準[4]。