創意
From Wikipedia, the free encyclopedia
創意(粵拼:cong3 ji3;英文:creativity),又叫創造力(粵拼:cong3 zou6 lik6),指一個個體諗出又新又有用嘅諗頭嘅能力,可以當係智能嘅重要一環[1][2]。呢種能力可以透過好多方法展現,舉幾個例說明:
- 喺科學上,研究者要做嘅係諗理論嚟解釋研究緊嘅現象;好似達爾文同愛因斯坦噉嘅出名科學家都係諗到前人冇諗過嘅理論-新,成功解釋得到某啲當代科學解釋唔到嘅現象-有用,改革咗當時科學界對嗰啲現象嘅理解[3];
- 喺工程學上,工程師要做嘅係設計出系統嚟解決實用嘅問題;例如愛迪生發明電燈膽噉,佢諗出電燈膽呢個當時係打前冇人諗過嘅設計-新,成功做到照明得嚟又唔使好似用火照明噉有火燭嘅危險-有用[4];
- 喺文學同藝術等嘅領域上,創作者要做嘅係創造出娛樂到人嘅作品(散文、樂曲以至畫作呀噉);例如一位作家寫短篇小說,諗出一份原創嘅作品-新,而且份作品令讀者睇得好開心過癮-有用,都算係創意嘅展現[5];
呀噉。响廿一世紀初嘅認知科學上,創意研究相當受注目,有好多認知科學家都出於好奇想窺探人腦係用咗咩認知功能嚟產生新又有用嘅諗頭嘅,會建立一啲理論模型嚟描述創意涉及嘅認知過程[6];另一方面,管理等應用領域嘅工作者又有興趣想睇呢啲研究,意圖想運用呢啲知識,諗吓有冇方法能夠提高員工做嘢嗰陣創新嘅能力[7][8]。