中華台北

中華台北（粵拼：zung1 waa4 toi4 bak1；英文：Chinese Taipei，代碼TPE），係中華奧委會參加國際體育比賽代表團嘅稱號，亦係而家中華民國（台澎金馬）參加國際運動比賽同國際組織所用嘅稱呼之一。

由於中華人民共和國中央人民政府主張「一個中國」嘅政策，反對有人喺國際上用「中華民國」呢個名。而且中華民國嘅聯合國地位喺1971年俾中華人民共和國取代咗，令到中華民國喺一定情況下要用其他嘅名義參與國際社會。

1979年國際奧委會喺日本名古屋開會決定，中華民國以中華台北嘅名義參加奧運會、亞運會等國際運動賽事，呢個決定稱為名古屋協定，但係違反咗當時嘅國際奧委會憲章，喺國際奧委會委員徐亨控告勝訴之後先修改憲章。1970年代後，中華民國亦都經常以「中華台北」嘅名義參加APEC、OECD等國際組織。