Loading AI tools
逃學威龍是1991年香港拍攝的喜劇電影，周星馳主演。
周星星
- 仲有乜事冇啊？以後冇乜事，唔好叫我上嚟吖嘛。冇前途，真係。
黃小龜（黃一山飾）
- 星哥，你仲犀利過李小龍呀！星哥，使唔使擦鞋呀？
化學老師（曾近榮飾）
- 真冇記性。
仲係噉青靚白淨
- 周星星（周星馳飾）：Good morning, Sir! 周星星報到！
- 局長（黃炳耀飾）：真係抵死，啊！仲係咁青靚白淨啊？轉個圈畀阿Sir睇下？唔使怕醜嘅，嚟啊！嚟啊！
- (周星星照辦）
- 局長：情不自禁！真係唔好意思啊。想唔想扎啊？
- 周星星：我唔想做鴨啊，Sir。
- 局長：我問你想唔想扎啊！
- 周星星：我係唔會做鴨嘅，Sir！
- 局長：九唔搭八！我問你想唔想升級啊！
- 周星星：……想！但係我係唔會出賣自己嘅貞操，Sir！
- 局長：邊個要你嘅貞操啫！我要你嘅青春啊！
- 周星星：青春對於我嚟講同貞操一樣咁重要，Sir！
- 局長：得嘞得嘞，我知道嘞。你聽我講埋先啊！
一支善良嘅槍
- 周星星：失槍嘅事件經常有發生嘅，Sir。
- 局長：但係嗰支係我嘅槍。
- 周星星：我真係戥你心碎。
- 局長：你知就好啦。嗰支搶跟咗我三十幾年，一槍都未開過，只係有時愛來撓痕嘅啫。唉！講起上嚟，都有啲痕，嚟啊，同我撓下佢。
- 周星星：背脊吓嘛？
- 局長：係！佢係一支善良嘅槍。
- 周星星：槍都有善良？
- 局長：我支槍本性係善良嘅嘛！最怕就係落喺啲壞學生嘅手上，嗰陣時就會濫殺無辜，塗炭生靈嘞。
- 周星星：放心啦Sir，我實行耖起成間學校，直到搵到支失槍為止。
- 局長：唉！耖得起仲使搵你咩？我就嚟退休嘅嘞嘛，而家至唔見咗支槍，畀人知道啊，我仲使見人嘅？唉！所以而家我想搵你呢，混入嗰間學校度……
- 周星星：Sir，教書，我冇乜信心嘅。
- 局長：冇人叫你扮教師，扮學生啫！
- 周星星：扮學生？！我當年就係因為最憎讀書，所以先加入警隊啫，我唔可以扮學生啊。Sir，你噉樣做，就即係等於帶我上去一個充滿毒蛇猛獸嘅火山口上，唔理我嘅哭叫，唔理我嘅哀嚎，狠狠地，毫無憐憫地，將我用腳一伸，伸落去火紅嘅岩漿裡頭。你噉做又於心何忍呢？
- 局長：噉咪好囉，等你活得豐富，死得精彩。你唔使講嘅喇，吟詩都吟唔甩嘅喇。嗱，呢度就有個call機表，你戴住佢，見到666，即係我call你。唔，仲有，講多次Good morning Sir畀我聽下。
- 周星星：Good~~ mor~ning~~ Sir~
- 局長：唔，噉就啱喇。記住唔好畀人知啊，咪一鑊熟㗎！
凌空飛起嘅鉸剪腳
- 局長：呢啲三角關係我唔識㗎！
- 周星星：嘩，你初初叫我接呢單case嘅時候，態度唔係噉嘅。
- 曹達華（吳孟達飾）：唔係啊，佢不嫐都係……
- 局長：我不嫐都係噉嘅，你聽到佢講啦！當初好聲好氣係氹你入局嘅啫！
- 曹達華：哎，頭啊頭啊，不如睇下出便啲師兄邊個識做，入嚟幫幫手，做好佢啊。
- 局長：你都白痴嘅！噉咪即係揚曬出去？（篤周星星嘅頭）你啊，我話畀你聽啊，快啲搞掂佢啊，如果唔係，我用鉸剪腳嚟夾爆你個頭。
- 周星星：乜，乜腳話？
- 局長：凌空飛起嗰挺鉸剪腳，一夾夾爆你個頭啊，鉸剪腳啊！驚未？
- 周星星：好驚啊。
餅印
- 訓導主任（秦沛飾）：喂喂，達叔，周星星真係你個仔？
- 曹達華（忍笑不住）：（對周星星）你高級過我，你講喇。
- 訓導主任：周星星，你講啊。……你哋唔好笑，你講啊。
- 周星星：係，係啊，係啊。
- 曹達華：啊，係，係，失禮，失禮。
- 地理老師（苑瓊丹飾）：我一早就估到啦，你睇佢哋啊，成個餅印噉樣啊！
- 周星星：唔係吖嘛，餅印？
- 眾人：佢老竇？
- 訓導主任：喂喂喂喂，唔係，嗱，呢度呢，你就姓曹，佢就姓周，噉點解啊？
- 曹達華：唔知呢，（對周星星）點解啊？
- 周星星（示意曹達華回答）：This is an order!
- 曹達華：Eh，出世嗰陣，我啊改咗佢做曹星星嘅，後尾佢就唔知點解，自己改做周星星。（對周星星）噉答得唔得啊？
- 周星星：That'r right!
- 曹達華：主任，冇乜嘢，我哋返出去喇。
鐵砂掌
- 局長：信唔信我一嘢鐵砂掌打爆你個頭吖嗱？
- 周星星：信！
- 曹達華：信，信！阿頭正話個掌都好有型啊！
- 周星星：係啊，係啊。
- 局長：入咗學兩個月一啲頭緒都冇？話畀我知你做過啲乜嘢嚟！
- 曹達華：講啊！
- 周星星：我嘅做法呢，就係首先同啲老師同埋學生溝通咗先。
- 曹達華：溝緊嘅喇，溝緊嘅喇。
- 局長：我話知你溝又好，通又好啦！總之一個月之內你要交返支槍出嚟！如果唔係兩個都要燉冬菇！
- 曹達華：我無所謂啊，我天生賤格，不求上進。
- 局長：我調你去守邊界啊！
- 曹達華：好啊好啊，多謝多謝！
- 局長：Hnggg！
- 周星星：阿頭你唔好咁衝動啊，你嘅鐵砂掌咁厲害，我哋經已好驚嘅嘞，係嘛？
- 曹達華：係啊係啊，好驚好驚！
- 周星星：請收返埋只鐵砂掌先吶。我一定盡快幫你搞掂。
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
