Kiú-liông chē-siâⁿ

Kiú-liông chē-siâⁿ (九龍寨城), ia̍h sī kiò chò Kiú-liông siâⁿ-chē (九龍城砦), sī Hiong-káng Kiú-liông-siâⁿ-khu ê chi̍t ê ûi-siâⁿ (圍城), tī 1993 nî hō͘ thiah--tiāu. Kiú-liông chē-siâⁿ í-chêng sī sè-kài jîn-kháu bi̍t-tō͘ choè ko ê tē-khu.

Le̍k-sú

Kiú-liông chē-siâⁿ kó͘-chá sī Kńg-tang-séng Sin-an-koān (新安縣) tī Kiú-liông ê chi̍t ê phiaⁿ-êng, tùi 1899 nî 12 goe̍h khai-sí sêng-ûi Eng-kok léng Hiong-káng ê chi̍t ê bû-chèng-hú chōng-thài ê ûi-siâⁿ (圍城).

1941 nî 12 goe̍h kàu 1945 nî 8 goe̍h, Hiong-káng hō͘ Ji̍t-pún chiàm-niá. Ji̍t-pún chiong Kiú-liông chē-siâⁿ ê siâⁿ-chhiûⁿ thiah--tiāu, chiong i ê chio̍h-thâu iōng-lâi khí Khé-tek Ki-tiûⁿ (啟德機場). Khit-chia̍h kap bô chhù toà ê lâng lâi kàu chia. In-ūi chit-tah ê chú-khoân ū cheng-gī, Hiong-káng kéng-chhat kap Hiong-káng chèng-hú bô-hoat-tō͘ chìn-ji̍p, Kiú-liông chē-siâⁿ piàn-sêng "sam-put-koán" (三不管) ê tē-khu: Hiong-káng chèng-hú m̄ kám koán, Eng-kok chèng-hú m̄ ài koán, Tiong-kok chèng-hú bô-hoat-tō͘ koán, chit-tah tī-an loān-chhau-chhau.

1984 nî, Tiong-kok kap Eng-kok chèng-hú chhiam-tēng Tiong-Eng Liân-ha̍p Seng-bêng, iok-tēng Eng-kok tī 1997 nî 7 goe̍h 1 ji̍t chiong Hiong-káng ê chú-khoân kau tńg Tiong-kok. 1987 nî kàu 1993 nî, Eng-kok kap Tiong-kok chiàu Tiong-Eng Liân-ha̍p Seng-bêng ê iok-tēng, saⁿ-kap chiong Kiú-liông chē-siâⁿ thiah--tiāu, kái choè Kiú-liông chē-siâⁿ Kong-hn̂g (九龍寨城公園).