Bì-luh
From Wikipedia, the free encyclopedia
Bì-luh[1], mā siá chò bih-luh, ia̍h ū kóng be̍h-á-chiú (麥仔酒), sī thong sè-kài siāng kó͘-chá, siāng liû-hêng ê chiú-cheng ím-liāu;[2][3][4][5] mā sī tē-saⁿ liû-hêng ê ím-liāu, pâi tī-leh chúi kap tê ê āu-piah.[6] Bì-luh sī ùi kok-si̍t kek chhut-lâi ê; siāng chia̍p ēng hoat-gê ê tōa-be̍h lâi kek, m̄-koh mā ū ēng be̍h-á, hoan-be̍h ia̍h tiū (bí) lâi kek ê. Tī kek-chiú ê kòe-têng tiong, be̍h-á-chiap lāi ê tiān-hún thn̂g ē choán-hòa chò chiú-cheng kap thòaⁿ-sng páu-hô (carbonation), chiâⁿ-chò chòe-āu ê bì-luh.[7] Tōa-pòaⁿ ê hiān-tāi bí-luh lóng sī iōng bí-luh-hoe khì kek--ê; lēng-gōa mā ē lām chi̍t-kóa tiâu-bī-che, chhin-chhiūⁿ chháu-pún si̍t-bu̍t ia̍h-sī kóe-chí. Tī siong-gia̍p ê kek-chiú kòe-têng tiong, chū-jiân thòaⁿ-sng páu-hô chok-iōng it-poaⁿ the̍h kiông-chè thòaⁿ-sng páu-hô lâi chú-tāi.[8]
Hiān-tāi bì-luh ê chiú-cheng lông-tō͘ (ABV) it-poaⁿ tī 4% chì 6% tiong-kan, m̄-koh mā ū-khó-lêng tī 0.5% chì 20%, mā ū chhiau-kòe 40% ê.[9] Bì-luh sī chē-chē kok-ka ê bûn-hòa ê chi̍t pō͘-hūn, chham chi̍t-kóa siā-hōe thoân-thóng kiat-ha̍p, chhin-chhiūⁿ bì-luh cheh, iáu-koh ū chi̍t-kóa phah-buh bûn-hòa mā chham bì-luh ū-koan.