From Wikipedia, the free encyclopedia
Schraevenpolder (Nederlands: 's-Gravenpolder) is een durp in de gemeênte Bossele in de Nederlandse previncie Zeêland. 't Durp 'ei 4.740 inweuners (01-01-2023) en is dimmee de twidde kern van de gemeênte, nae Eintjeszand. Vee mensen van Schraevenpolder bin lid van de Grifformeerde Gemeênte. Bie de Twidde Kaemerverkiezingen van 2012 'aelde de SGP net gin meerdereid van de stemmen in het durp, 46,7%. Tot 1970 was Schraevenpolder een zelfstandehe gemeênte, wirra ook de in 1816 op'eheven gemeênte Zweêke toe be'oorde. Schraevenpolder leit an de ouwe tramlijn van Hoes nae Bossele. Vroeher wier dit 't Peeëlijntje genoemd. An de rand van het durp stit meule De Korenhalm uut 1876.
'T waopen van 's-Gravenpolder is in zilver een adelaer van sabel (zwart), mie een rand van azuur (blauw) wira'n acht pennieng'n van zilver sti'n. 'T is 't waopen van de baronnen Van Polheim, die'an korte tiet heren van 's Gravenpolder 'ewist bin. 'T waopen wier a in de 17e eeuw hebruukt en wier op 31 juli 1817 bevestigd als hemi'ntewaopen.
De vlahhe besti uut drie horizontale baenen in de kleur'n van 't wapen (blauw, wit, zwart) en wier door de hemi'nteri'd bevestigd op 6 april 1954. De vlahhe wier ni' de hemi'ntelijke herindi'lieng ni'bie nie mi hebruukt, maar tehenwoardig wor 'n ieder jaer tijdens de braderie van 's-Gravenpolder op de eerste zitterdag van juni wee 'ehese.
Dit stikje is geschreven deur vrouwe Walrave-Nijsse:
Zoas zó vee misjes most 'k ok a vroeg lêêre breie, mè d'r zulle d'r nie vee weeze, die zoas ik 't breien deur d'r vaoder elêêrd is.
'k Behon mie 't breien van 'n lankwerpug lapje in de rubbelsteeke. A 't dubbel'esloohe toe'enaoid en d'r 'n knopje an'ezet wier, wirroover dan 'n lusje kwam, was 't 'n portemunneetje. Iets brêêjer lapje wier 'n nachtzakje, mè dan was t'r a 'n aeverechse steeke an te pass' ekomme en was 't breisel an d'êêne kant rechs en an d'aore kant aeverechs. Teehenwórug noeme ze dat 'n tricoosteeke.
't Bostrokje most twi rechs twi aeverechs ebreid worre en ziedaer d'êêste andwerkjes wazze herèêd. 'n leverug kind kon éêl wat bie meakoare breie, mè 't wazze nie aollemille hezelluhhe of leuke 'andwerkjes.
Wat te dienken van twi lange kousen, wivan d'n êênen sestug sentimeter lank was, kompleet mie minderingen in 't béên en da voe 'n kind benee de tiene. Kó je hoed mie breien of 'andwerken in 't alhemêên overweg, dan moch je ok noh wè 's wat leuks maeke. Zöas 'n jasje voe 'n klein kind breie, 'n overhóóijertje van matting naoie en mie kruussteekjes borduure, 'n neusdoekje mie 'n hestupt randje maeke, enzómeer.
Zoas uut 't boovenstaende bliekt, wier t'r nie allêêne ebreid, mè ok naoie, aoke, maoze en kruussteekborduurwerk kwamme an de burte.
'n Noailappe mie aollerleie naedjes en zómpjes, knopshaeten, nesselhaetjes en lusjes anzette. Ok 'n kinder'emmetje van zowat fêêrtug sentimeter lank van onheblêêkt ketoen, ofezet an d'n aols en èrmshaeten mie zóhenaemd èmdepunt, 'n emmetje voe'n klein kind mie'n êêl smal puntje, 'n kossak mie knopshaeten en êên mie hnters, 'n boekezak mie je naem d'r op eborduurd, wirrin ielke weeke 't boek uut de schoolbiebleteek mee ni ruus en trug ni schoole enoome wier en 'n lappe hoed wirrin twelf stikken 'ezet moste worre.
't Noaisel wier vast'ezet an 'n band, 'n zóhenaemde naoiband. Dat waz 'n meubelsingelband van fuuftug sentimeter lank, an 't ênde versterkt mie leer, wirrin 'n knopshat zat. Da knopshat hieng over 'n koopere knoppe, die op de lessenêr van de schoolbanke vast zat. Vervolhens wier t'r op de siengelband mie 'n spelle 't noaisel vast'ezet. Op die meniere wier 't werk strek ehouwe.
Aoke is wee êêl wat aors dan breie. Aoke doe je mie'n aokeprieme in plekke van mie vier priemen, zoas bie 't breien. Noe wor t'r êên priempje van zowat twelf sentimeter hebruukt.
In de schoole mos je dan behunne mie 'n leer'oaklapje van losse, stokjes, vaste en oalve vaste, enzómeer. Waz je dan d'aokkunst machtug, dan moch je an 'n kleedje behunne. Ooverehens wè kleine kleedjes, laeter ok nöh 'n kraogje.
Dan maozze, dat waz op breisel noh wè te doen, mè op stremien was 't wè errug moeiluk, dat wil zehhe a t'r 'n hat in eknipt was. Dir ao de huus vee dol mie, omda fesoenluk te kriehen.
'n Téêkenlappe was wee hlad iets aors. 't Abc van kruussteekje mie róód en blauw dmc-haeren en twi soorten letters, de siefers van nul toet neehene, verschillende randjes en twi kêêr de naem van de maekster mie 't jêrtal weire a borduurend op de téêkenlappe ezet. Ok 'n overhóóijertje van matting moch verzie worre van 'n rand van róód-blaeuwe kruussteekversieruhhe.
't Andwerk wier op'eborhe in 'n kisje, 't'andwerkkisje in de kasse in 't schoollokaal. Op de voorkant was b'aolve 'n nummer eschilderd mie zwarte verve ok 'n koopere rienk bevestugd. Dit leste om 't kistje makkelukker uut de kasse te trokken. lelk kind ao d'r eihen nummer.
| Gemeênte Bossele |  |
|---|---|
|
Durpen: Baerland · Bossele · Driewehen · 'Eintjeszand · Ellesdiek · Kwedamme · 't Lewedurp · 't Nieuwedurp · Oedjeskerke · Ouwelande · Ovezande · Schrabbekerke · Schraevenpolder · Serenoek · Ternisse |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
