ჰატშეფსუტი

ჰატშეფსუტი (დ. დოხოლაფირო ჯვ. წ. 1503 — ღ. ჯვ. წ. 1480) — ჯვეში ეგვიპტეშ დიაფალი (ფარაონი), ეგვიპტეშ XVIII დინასტიაშ წჷმმარინაფალი. თუტმოს I-აშ ცირასქუა დო თიში წორომადუდე 15 წანაშ მეძენას.

ჰატშეფსუტიშ ბიუსტი, მეტროპოლიტენიშ ხელუანობაშ მუზეუმი, ნიუ-იორკი.

ხვისტას ართიანს ონჩალუდეს ჰატშეფსუტი, თუტმოს II (ჰატშეფსუტიშ გვერდო ჯიმა დო ალმასქუ) დო თუტმოს III. ჰატშეფსუტიშ მოხუჯე დიდებულეფიშ პარტიაქ თუტმოს III დუდალაშე დითხინჷ დო ჰატშეფსუტი მაფათ გჷნართინჷ. ეგვიპტეშ დინოხოლენი ჩაჩახით ირგებეს ნუბიალეფქ დო ეიბუძოლეს, მარა ჰატშეფსუტიქ ქენარანგჷ დო ობჟათე პალესტინაშათ გოუტჷ დჷმასაჯაფალი ექსპედიციეფი. ჰატშეფსუტი ვა ლჷმენდჷ, ქიანაშ სიდინდარე ოაკოგაფე საქვარშო გჷმირინჷ — ეკადგინჷ ჰიქსოსებიშით აკნარღვეფჷ ჯვეში ოხიდეფი დო აკაგჷ ახალი (დაირ-ელ-ბაჰრი); გოახალჷ ობადეშეფიშ დამუშება სინაიშ ჩქონს დო მანწყჷ ოვაჭარე ექსპედიციეფი პუნტიშ ქვეყანაშა.

ჰატშეფსუტიშ ღურაშ უკული, თუტმოს III კონწარო ერჯებუდჷ თიშ შვენას დო დახე ირდიხას მოჯალაგჷ თიში ჯოხო.

ლიტერატურა

• ქორთული სხუნუეფიშ ენციკლოპედია, ტ. 11, ხს. 607, ქართი, 1987 წანა.