რაჭა
From Wikipedia, the free encyclopedia
რაჭა — საქორთუოშ ისტორიულ-გეოგრაფიული მუხური. იდვალუაფუ ბჟადაალ საქორთუოშ ოორუე-ბჟადაალ ნორთის, წყარმალუ რიონიშ დო მუშ ნადუეფიშ ლეხერს. ოორუეშე რაჭა ომძღჷ ოსეთის, ოორუე-ბჟადაალშე თუდოლენ შონეს, ობჟათეშე იმერეთის, ელახშე დინოხოლენ ქართლის, ბჟადალშე ლეჩხუმს. ისტორიულ-გეოგრაფიული რაჭა სუმ კუნთხუთ ირთუუდჷ: გვალაშ რაჭა, ჟიმოლენრაჭა დო თუდოლენრაჭა. ამდღარი მონწყილობათ იკათუანს რაჭა-ლეჩხუმ-თუდოლენ შონეშ აკანიშ ონიშ დო ამბროლაურიშ მუნიციპალიტეტეფიშ ტერიტორიეფს. ორდოიან პერიოდეფს რაჭა თაკვერწკჷმა ართო მიშეშჷ საერისთავოშა, ნამუთ ეგრისიშ ომაფეშა მიშეშჷ. უკულ მიშეშჷ ლეჩხუმწკჷმა ართო რაჭა-ლეჩხუმიშ საერისთავოშა. X ოშწანურაშ ეკონიაშე იქიმინჷ რაჭაშ საერისთავოქ, ნამუშ მაართა მამართვალი (ერისთავი) რდჷ რატი ბაღვაში. XIII ოშწანურაშ 80-იან წანეფს დავით ნარინქ გაუქვჷ საერისთავო დო თე ტერიტორია ომაფე დიხეფო გინაშქუ. იმერეთიშ ომაფეშ რუსეთიშ სანძღოეფშა მიშულაშ უკული, რაჭაშ ტერიტორია ქიმინჷნდჷ დიო რაჭაშ ოკრუგის, უკული რაჭაშ მაზრას. ვახუშტი ბაგრატიონიშ „აღწერა სამეფოსა საქართველოსაშ“ მეჯინათ, რაჭაშ აკანს შხვადოშხვა ბორჯის მართუნდეს მუდგაზმარენი პატჷნური ოგვარეულე: წულუკიძე, იაშვილი, ჯაფარიძე, ინასარიძე, ლაშხისშვილი.
![Thumb image](http://upload.wikimedia.org/wikipedia/commons/thumb/f/fc/RachaHistorical.jpg/320px-RachaHistorical.jpg)
![Thumb image](http://upload.wikimedia.org/wikipedia/commons/thumb/0/0c/Georgia_Racha-Lechkhumi_and_Kvemo_Svaneti_location_map.svg/640px-Georgia_Racha-Lechkhumi_and_Kvemo_Svaneti_location_map.svg.png)