ჰიჯრა (კალენდარი)
From Wikipedia, the free encyclopedia
ჰიჯრა (არაბ. هِجْرَة – გჷნოხორაფა, გჷნოლაფა, ემიგრაცია) — მუსლიმურ ქიანეფს გოფაჩილი კალენდარიშ ჯოხოდვალა. ხალიფა უმარ I-აშ ბორჯის (634-644) ჰიჯრა გჷმოცხადაფილი რდჷ მუსლიმური წანეფიშეჭარუაშ დაჭყაფურო (მუსლიმური ერა). ჩინებული რე თუთაშ დო ბჟაშ ჰიჯრაშ კალენდარეფი. თუთაშ კალენდარი გოფაჩილი რე არხო დო შქა ბჟაეიოლიშ მუსულმანურ ქიანეფს, ბჟაშ – ირანს, ავღანეთის, თურქეთის. ჰიჯრაშ თუთაშ კალენდარიშ მაართა დღა რე 622 წანაშ 16 კვირკვე (მუსლიმური ტრადიციაშ მეჯინათ, მაჰმადიშ დო თიში გემაჸვენჯეფიშ (მუჰაჯირეფიშ) მექაშე მედინაშა გჷნოხორაფაშ თარიღი), ბჟაშ კალენდარიშ – 20-21 მელახი (აფუნიშ ბუნიობაშ ბორჯი). მუსლიმურ თუთაშ წანმოწანას 354 დღა რე, თუთას – 29-30 დღა. ჰიჯრაშ კალენდარიშ დღლეფი 11-12-ით კუნტა რე საარძოთ გოფაჩილ გრიგორიანული კალენდარიშ დღალეფშე დო თეშ გეშა ირ 33 წანმოწანას ბღებულენთ ართი წანაშ გჷნორთას. ჰიჯრაშ წანეფიშ გჷნოჸონაფა გრიგორიანულშა დო პიჯაშოთ შილებე სპეციალური ფორმულეფით ვარდა ტაბულეფიშ საშუალებათ.