![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/7/73/Map_of_Georgia_with_Abkhazia_and_South_Ossetia_highlighted.svg/langxmf-640px-Map_of_Georgia_with_Abkhazia_and_South_Ossetia_highlighted.svg.png&w=640&q=50)
საქორთუოშ ოკუპირაფილი ტერიტორიეფი
From Wikipedia, the free encyclopedia
საქორთუოშ ოკუპირაფილი ტერიტორიეფი — 2008 წანაშ რუსეთ-საქორთუოშ ლჷმაშ უკული, რუსეთიშით ოკუპირაფილი საქორთუოშ ტერიტორიეფი. თე ტერიტორიეფშა მიშმურს აფხაზეთიშ ავტონომიური რესპუბლიკა დო სხუნუეფიშ საქორთუოშ ჸოფირი ობჟათე ოსეთიშ ავტონომიურ ოლქი (სამაჩაბლო) (ქძ. ობჟათე ოსეთიშ ობორჯე ადმინისტრაციულ-ტერიტორიული ართული), ნამუეფიშ სტატუსი ოერეფოშქაშე დებაშ მეკონი რე.
![]() |
![](http://upload.wikimedia.org/wikipedia/commons/thumb/7/73/Map_of_Georgia_with_Abkhazia_and_South_Ossetia_highlighted.svg/640px-Map_of_Georgia_with_Abkhazia_and_South_Ossetia_highlighted.svg.png)
2008 წანაშ ლჷმაშ უკული დო აფხაზეთიშ დო სამაჩაბლოშ გეჸვენჯი რუსული ოკუპაციაშ უკჯული, რუსეთიშ თარობა გოეროშ შხვა ოთხ სახენწჷფოწკჷმა ართო თე ტერიტორიეფს გუთმოსხუნჷნა, მუჭოთ ზოხრინელ სუვერენულ სახენწჷფოთ: აფხაზეთიშ რესპუბლიკა დო ობჟათე ოსეთიშ რესპუბლიკა. რუსეთიშ ოკუპაციაშახ, ვაღიარაფილი აფხაზეთიშ რესპუბლიკა დო ვაღიარაფილი ობჟათე ოსეთიშ რესპუბლიკა ედომშამო ვაკონტროლენდჷ თინეფიშე პრეტენზიაშ მოღვენ ტერიტორიეფს. რუსეთიქ აფხაზეთის დო ობჟათე ოსეთის ქეგიორინუ მუში ოურდუმე ბაზეფი. თაშნეშე, რუსეთი ვაუტენს ევროპაშ რსხუშ ოდჷმაკვირე მისიას აფხაზეთშა დო სამაჩაბლოშა. თეშ მოხ, რუსეთიქ ხე ქუმაჭარჷ აპიჯალას ჟირხოლო ტერიტორიაშ დე-ფაქტო ომენოღალე ადმინისტრაციაწკჷმა, თინეფიშ ოურდუმე დო ეკონომიკური კუთნთხუთ რუსეთშა ინტეგრაციაშ გეშა. თეწკჷმა ართო რუსულ ჯარეფქ ქჷდიჭყეს დემარკაციაშ პროცესი (ჩი8ნებული მუჭოთ „ბორდერიზაცია“) საქორთუოშ დო მუშითგჷმოცხადაფილ ტერიტორიეფს შქას, თაშნეშე თე ღოზიშ ფარგანეფს გალე.
ჟირხოლო ტერიტორია, მუჭოთ აფხაზეთი, თეშ სამაჩაბლო საართოთ რე აღიარაფილი, მუჭოთ საქორთუოშ უგურთუყ ნორთი დო ართო წჷმარინუანს საქორთუოშ ოერეფოშქაშეთ აღიარაფილ ტერიტორიაშ 20 პროცენტის. 2008 წანა მეღებული „ოკუპირაფილი ტერიტორიეფიშ გეშა კანონი“ ითოლწონენს ზისხირიშ სამართალიშ დჷნაშებუს დო აწარმენს ზისხირსამართალებურ რაჸუას აფხაზეთშა დო სამაჩაბლოშა მიშულას რუსეთიშ ტერიტორიაშე სპეციალური ალობაშ მეჩამაშ უმუშო. საქორთუოშ კანონი თაშნეშე ირზენს მუთუნნერი ეკონომიკურ საქვარუაშ წარმებას ტექ ხვალე საქორთუოშ კანონდვალაშ მეჯინათ. საქორთუო დო ოერეფოშქაშე ჯარალუაშ შხვა მაკათურეფი, თინეფს შქას გოართოიანაფილი ომაფე, ამერიკაშ აკოართაფილი შტატეფი, კანადა, გერმანია, თურქეთი, იაპონია, ისრაელი, ავსტრალია, ჩინეთი, იტალია, საფრანგეთი, ბრაზილია, უკრაინა, ევროპაშ რსხუ, ეუთო დო ევროპაშ სხუნუ, თაშნეშე გაეროქ იჩინჷ აფხაზეთი დო ობჟათე ოსეთი ოკუპირაფილ ტერიტორიეფო დო გადღანჷ რუსეთიშ ოურდუმე ჸოფა დო ქიმინუეფი ათე ტერიტორიეფს.