From Wikipedia, the free encyclopedia
孙文(1866年11月12号-1925年3月12号),字载之,号逸仙,别名孙中山,南粤广府香山县(乃朝广东省中山市)人,是19世纪挨末阶段顶有名个民主革命家,长期从事反对清朝个活动,畀交关人认为是第一个追求共和个人物。伊也是中国国民党个创始人搭第一任总理,第一任中华民国个临时大总统。
伊出身在拉一个贫民家庭,从小就听村子当中个老人讲太平天国个事体,慢慢产生反清想法。1880年代,伊跟随自家阿哥去夏威夷檀香山,接受外国教育,慢慢就有对清朝个弗满意。到1892年,伊从香港学医毕业之后,听从老师个推荐,去广州等待去天津投靠李鸿章,弗曾想畀门房刁难,乃么一狠心,决定搞大事体,也就是革命。
1894年,孙跑到在檀香山,成立兴中会。1895年,兴中会发动乙未广州起义。1905年,在日本东京组成中国同盟会,孙因为资格老,也就畀推为总理;并且确定“驱除鞑虏,恢复中华,建立民国,平均地权”个口号。之后,伊综合欧美交关思想,搞出三民主义个花头,跟从个人也就更加多哉。
弗过,孙在拉军事高头弗灵光,伊让同盟会集中在拉两广地区搞活动,先后九趟搞事体,弗过侪失败。尤其是1911年4月个黄花岗起义,让同盟会损失交关人力物力,加上伊同同盟会内部个浙江人(尤其是章太炎)有矛盾,所以到1911年下半年,事实高头已经半隐退,跑到美国科罗拉多州洗盘子去哉,
1911年10月,长江中部个湖北武昌府发生变化,武昌起义成功,孙文个命运也变动起来。当年12月29号,伊畀十七省代表在南京推选为中华民国临时大总统,随后赶紧跑回国内。1912年1月1号,孙在拉南京两江总督府个房子当中宣布就职,建立中华民国临时政府。弗过,伊无军队无财力,老快就只好禅位袁世凯后下台,
之后两年,袁世凯把孙一个铁路督办个头衔,让伊导出指点江山。好日脚还没几天,伊老早个老同志宋教仁突然在拉去北京接任总理个路高头畀刺杀(参见宋教仁遇刺案)。之后孙反应邪气激烈,拿迭个事体当成反对袁世凯个借口,发动讨袁、护国、护法、联俄。1919年,将中华革命党改组为中国国民党。在苏联帮助下,筹备国民革命军北伐。1924年底,受段祺瑞邀请,伊从广州出发,短暂停留上海,之后到天津、北京,同张作霖进行所谓和谈,但迭个辰光伊个身体已经邪气推板,到北京之后无几许辰光,就死脱。之后,伊个灵柩停叻北京西郊香山个碧云寺,国民党北伐战争之后,伊个灵柩畀迎回国民党政府所在个南京中山陵。
乃歇中国民间普遍尊称伊为「革命先行者」。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.