From Wikipedia, the free encyclopedia
越剧，中国主要戏曲剧种之一，浙江嵊州起，上海兴，江南繁荣，中国五大剧种之一。[1][2]有第二国剧个讲法。[3]越剧曲调软带带，小提琴协奏曲《梁祝》个主旋律便用越剧个曲调。[4]越剧起世便只男演员，到上海发展之后为女班演出受欢迎险，发展起所有角色都让女个来演个女班越剧。1949年之后，开始招一许男演员，但玱朞叫旧是女班越剧为主。越剧原先来江浙沪作兴，后晚来全中国都受欢迎。[5]越剧舞台语音个基础语音是嵊县方言腔。勒越剧发展过程中，越剧语音来嵊州言话个基础上，吸收了中州音韵搭官话个语音，使得越剧个观众范围扩大。[6]
2006年5月，越剧收进文化部头一批国家级非物质文化遗产。[7]
越剧，又叫绍兴戏，英文名Yue Opera。目前对“越剧”箇只名字个顶顶早起源有争议，箇是因为老早各地各人个讲法侪弗一样，资料记载也各有区别，所以大家对越剧名字个由来搭变化並呒没一個准确个共识[8]。一般认为伊是从浙江等地个民间戏曲当中演变过来个。
目前主流认可伊一开始是嵊县（现嵊州）地区农村个“落地唱书”，勒拉清朝光绪三十二年（1906年）春天演变成草台浪演出个戏曲[9]。到1939年，越剧勒拉上海有交关爱好者，也有弗少戏班，有戏班选择用“越剧”箇個名字进行宣传，並勒拉报纸浪写伊背后个忍辱负重个意思，故咾各地逐渐侪叫伊“越剧”哉[10]。
越剧角色个行当分成小生、小旦、老生、老旦、小丑、大面六個，主要是小生小旦。1940年代越剧改革开始到今朝，行当个区别并弗严格。
越剧个主要腔调是[四工调]、[尺调]、[弦下调]、[C调腔]等。
越剧目前经常畀人提到个艺术流派有尹(桂芳)派、徐(玉兰)派、毕(春芳)派、范(瑞娟)派、陆(锦花)派、袁(雪芬)派、王(文娟)派、戚(雅仙)派、傅(全香)派、金(采凤)派、吕(瑞英)派、张(云霞)派、张(桂凤)派十三個流派[11] ，其实还有竺水招派、吴小楼派、徐天红派、商芳臣派等流派。尹(桂芳)派、徐(玉兰)派、毕(春芳)派、范(瑞娟)派、陆(锦花)派、竺(水招)是小生流派，袁(雪芬)派、王(文娟)派、戚(雅仙)派、傅(全香)派、金(采凤)派、吕(瑞英)派、张(云霞)派是小旦流派，张桂凤派、吴小楼派、徐天红派、商芳臣派是老生流派。
越剧流派个发展对推动越剧个发展做出邪气重大个贡献。
越剧音乐优美抒情，故咾广受欢迎。《梁祝小提琴协奏曲》就是用越剧个曲调做基础改编出来个[12]。
越剧个主奏乐器是鼓板、越胡，其他乐器还有扬琴、二胡、中胡、大提琴等。演奏乐队传统上主要用中国民族乐器，分吹、拉、弹、打四個部分。
越剧舞台美术独具特色，畀黄梅戏、潮剧、琼剧、豫剧等剧种学习。越剧服饰清丽柔美，借鉴古代仕女图个样式，箇跟传统戏曲衣裳繁琐弗一样，旦角特别明显。同京剧等剧种比，越剧化装搭仔布景更加写实[13][14]。
越剧化装兼具传统水粉化装法搭仔电影话剧化装个长处，经常用油彩化装，风格柔美明快。勒拉旦角化装方面，越剧用独特个越剧古装头套，造型上借鉴古装仕女画个发式。古装戏里向，一般弗用脸谱式个化装，跟其他剧种比更加生活化。
越剧服装清丽柔美淡雅。服装色彩上多用中间颜色，简洁，弗浓重。越剧旦角个服装，多借鉴中国传统人物画（特别是仕女画）搭仔传统美术，裙子多是百褶裙，多系拉上衣外头。衣料上，主要用无反光性个面料，比方讲绉缎、乔其纱[14]。
越剧个布景同表演风格密切结合，用个是立体个布景，较其他剧种更加写实。越剧里向个道具弗少直接用个是生活用品，有星用个是仿真制作个，刀枪棍剑等常用道具则更加轻巧化[14]。
1940年代，舞台灯光搭仔扩音设备逐步勒拉越剧演出活动里向出现。1950年代，剧场演出个辰光，开始勒拉舞台边浪摆只显示屏，用字幕放台词，方便观众。1960年代，开始用录音设备来制造声音效果，比方讲打雷个声音。
越剧是顶顶早建立导演制个剧种之一。1940年代，袁雪芬倡导越剧改革，越剧开始确立编导制，促进越剧个发展。
越剧刚出现个辰光，艺人是勒拉木桶搭起个临时舞台高头演出个，条件邪气简陋。进入上海以後，越剧开始勒拉剧院里向演出。越剧高光个辰光，它勒拉上海个大剧院当中争得一席之地。
越剧历史虽短，但发展迅速。据统计，1949年个辰光，各地越剧演出团体上演个剧目有近6000只。1949年后，剧团国有化，剧目也得到整理搭仔进一步个发展。
比较优秀个传统剧目有：《红楼梦》《梁山伯搭祝英台》《碧玉簪》《情探》《追鱼》《盘夫索夫》《李翠英》《血手印》《打金枝》《西厢记》《孔雀东南飞》等；
优秀个现代剧目有：《祥林嫂》《早春二月》《浪荡子》《家》《一缕麻》《第一趟亲密接触》等。[1]
早期，越剧只有男演员，进入上海发展后因女班演出广受欢迎，发展成各個角色侪由女演员演个女子越剧。1949年后，恢復招收部分男演员。因为越剧声腔阴柔，男演员咾难演出越剧个声腔特点，故咾今朝大多数侪用女班戏，越剧界个男演员邪气少。
男班时期，著名小旦演员有：卫梅朵、白玉梅、费翠棠、金雪芳等，小生演员有：王永春、张云标、张志帆、支维永等，老生演员有：马潮水、娄天红、童正初、金晓邦等，老旦演员有：姚方松、金世明等，小丑演员有：马阿顺、金瑞苗等，大面演员有：金荣水、李桂芳等。[15]
绍兴文戏时期，男演员越来越少，著名小旦演员有：施银花、赵瑞花、小白玉梅、姚水娟、王杏花、筱丹桂、邢竹琴、支兰芳等，小生演员有：屠杏花、马樟花、竺素娥、李艳芳、魏素云、王水花等，老旦演员有：周宝奎，老生演员有：商芳臣等。施银花、赵瑞花、王杏花、姚水娟、筱丹桂五個人合称“三花一娟一桂”。[16]
后些来又出现尹桂芳、徐玉兰、竺水招、袁雪芬、张桂凤、吴小楼、傅全香、徐天红、范瑞娟、王文娟、戚雅仙、吕瑞英、张云霞等出名个越剧演员。尹桂芳、徐玉兰、竺水招、筱丹桂、袁雪芬、张桂凤、吴小楼、傅全香、徐天红、范瑞娟箇十个人，大家叫伊拉越剧十姐妹。
文革以后，著名小旦演员有方亚芬、王志萍、单仰萍、陈飞、吴素英、金静、黄依群、何赛飞、何英、陶慧敏、颜恝等，小生演员有韩婷婷、茅威涛、赵志刚、吴凤花、钱惠丽、郑国凤、萧雅、王君安等，老生演员有董柯娣等，老旦演员有章海灵、俞会珍等。
出名个越剧导演有吴琛、黄沙、金风等。越剧编剧有陶贤、樊迪民、庄志、徐进、顾锡东、胡小孩等。知名个越剧作曲有顾振遐、周大风等。舞美设计有苏石风等。
出名个越剧演出团体有上海越剧院、浙江越剧团、南京市越剧团、福建省芳华越剧团、杭州越剧院、浙江小百花越剧团、绍兴小百花越剧团、宁波小百花越剧团、嵊州市越剧团等。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
