From Wikipedia, the free encyclopedia
康有为(1858年3月19号-1927年3月31号),原名祖诒,字广厦,号长素,又号明夷、更生、西樵山人、游存叟、天游化人,南粤广东省南海县丹灶苏村人,一般称呼伊为康南海,伊是19世纪后半段东亚邪气有名个政治人物,也是戊戌变法个组织者搭后势来保皇党领袖。
康有为个祖宗侪是当官个,所以伊屋里比较有钞票。年轻辰光欢喜看杂书,考科举交关趟侪弗中。弗过因为欢喜发表激进言论,也慢慢在拉广州获得一批自家个弟子,个当中,就包括后势来中华民族个发明者梁启超。
1894年,清帝国在拉日清战争当中惨败,读书人慢慢侪认识到必须在拉制度层面对帝国进行改革。康有为抓住迭个机会,跑到北京,宣传自家个极端思想,慢慢获得交关粉丝。光绪廿一年(1895年),伊考中进士,弗过弗曾在拉北京蹲几天,又跑到上海广州,获得自家个存在感。
康有为个举动,引发想摆脱慈禧太后个光绪帝关注,到1898年,康有为得到机会,同自家弟子梁启超、谭嗣同之类一道,合作戊戌变法,又称百日维新,弗过,因为眼高手低,嘸多少辰光就宣告失败。康有为要躲避慈禧太后通缉,在拉失败之前就秘密跑路。
变法失败之后,康有为跑到日本定居,创造出一个所谓个“密诏”故事,讲是光绪让伊在拉海外活动,恢复皇帝个实权。1900年代,康有为周游欧洲、美洲交关国家,利用自家个特殊地位,从海外华人当中招揽支持力量,获得经济赞助,并且依靠迭个手段,在拉瑞典买到过一个小岛,作为自家个别墅。弗过,因为留学生开始慢慢倾向孙中山搭伊个中国同盟会,保皇立宪派个力量,在拉后势来减弱,这也让康有为对革命党邪气反感,成为一个彻底个保皇派。
1911年辛亥革命爆发,第二年2樾,宣统退位后,康有为跑到上海,一只反对共和,畀个辰光个年轻人当成一个典型个前清遗老。1917年,伊联络张勋,发动兵变,拥立宣统帝,是为张勋复辟,弗过十二天之后,就畀段祺瑞讨平。之后,康有为开始炮制所谓个“孔教会”,宣传要在拉中国创造一个“国教”,通过尊孔来团结全国。迭个做法同五四运动之后个新一代年轻人完全冲突,也让伊成为国民党、共产党侪准备做脱个反面人物。
1927年,北伐战争当中,蒋介石个军队进入到江浙地区,看到势头弗大妙个康有为,紧急拿自家在拉沪西个房地产卖脱,跑路青岛,准备在拉此地定居,继续同在拉天津个溥仪联络串联。弗过刚刚到青岛个第二天,伊就在拉一场宴会后突然死脱,死因到现在也弗大清爽。
康有为死脱之后,埋到青岛李村东南侧的枣儿山,1948年正式安葬,第二年10月,举行康有为迁葬搭墓碑揭幕仪式。弗过,到文革辰光,因为康畀定性为“中国历史高头顶反动个保皇派”,导致墓地畀红卫兵掘开,遗骸畀造反派掘墓鞭打,并拿伊个脑子拉出来游街。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.