Charles Bruneau

Charles Bruneau, c' esteut on grand linwincieus francès, vinou e monde li 19 di nôvimbe 1883 a Tchô el Walonreye di France. I mora li 3 d' awousse 1969.

Loukîz a : «Inketes da Bruneau so les patwès d' Årdene (lives)»

I djåzéve coramint l' walon, k' esteut l' lingaedje d' atôtchance di tertos a Tchô tins di ses djonnès anêyes.

Ouve pol walon

Il a studyî les pårlers del Bijhe do dipårtumint des Årdenes francesses, k' i lome les “patwès d' Årdene”. Il aveut stî enondé po ça pa Jules Gillieron. Il a cmincî a-z eplaidî ses trovas e 1913.

• Etude phonétique des patois d'Ardenne (1913), la k' il esplike li sistinme fonetike (ki n' est nén co l' Alfabet Fonetike Eternåcionå), k' i s' va siervi po ses rcwerances.
• La limite des dialectes wallon, champenois et lorrain en Ardenne (1913), la k' i rwaite li djeyografeye des troes lingaedjes, aprume dins l' Payis di Smwès, li bote di Djivet, eyet li bote do Hinnot;
• Enquête linguistique sur les patois d'Ardenne, tome I (1914).
• Enquête linguistique sur les patois d'Ardenne, tome II (1926).

Ces cwate lives la sont studyîs sol Wikipedia e walon dins ene pådje "Inketes da Bruneau so les patwès d' Årdene".

Il a eto scrît l' adrovaedje do motî da A. Vauchelet so les pårlers d' Årdene francesse.

Charles Bruneau a divnou professeur al Sorbone.

La, i va rprinde l' Histoire de la langue française da Ferdinand Brunot cwand ci-ci dihota. I nd eplaidrè les tomes XII et XIII.

Il a eto rprins et rassonrer pår li Précis de grammaire historique de la langue française, eco on live da Brunot.

Gn a sacwants scoles et institucions k' ont stî batijheyes a s' no.

Eredjistrumints

Tot fjhant ses rcweraedjes so papî, Tchåle Bruneau a ossu eredjistré ses temoens. Les eredjistrumints sont wårdés al Bibioteke nåcionåle di France.

Gn a 31 plakes, inte di zeles 14 e walon :

• ene e walon do Levant
  • Lidje : tchanson (o ! come dji voe voltî l' vijhén)
• 7 e walon del Basse Årdene
  • Åbî
    • martchandaedje po vinde do toubak
    • margaye
    • plantaedje do toubak
  • Rotchô
    • li bouwêye
    • Vizite di l’ eveke ; li dicåce
  • Bive : L’ ovraedje avå les tchamps
  • Orcîmont : L’ ovraedje avå les tchamps
• 3 e walon do Mitan
  • Biarin  : li coide al doye (recitaedje) (boket da Augustin Vermer)
  • Nameur : tchanson e namurwès
  • Ansreme : Recitaedje (sint Pire et sint Djôzef po l' administråcion do Paradis)
• ene et dmey e walon do Coûtchant
  • Marlanwé (Aschate walon do Coûtchant / picård) : cåzaedje so Marlanwé
• 2 el Walonreye di France
  • Lintchamp  : Cåzaedje
  • Fumwè (Walonreye di France, aschate Mitan Coûtchant Basse Årdene) : Ovraedje ezès schayires

Les ôtès plakes sont-st e gåmès (Tchini, Abâ-l'-Nouve, Sinte-Mareye-so-Smwès) e tchampnwès (Vresse, Bôhan), des aschates walon-gåmès-tchampnwès (Bouyon, Corbion), des aschate walon-gåmès (Arbûmont).

Hårdêye divintrinne

• Inketes da Bruneau so les patwès d' Årdene (lives)

Hårdêyes difoûtrinnes

• (fr) Si biyografeye
• Ses eredjistrumints (walon, gåmès, tchampnwès)