Louis de la Censerie

Louis de la Censerie (Brugge, 7 september 1838 - Brugge, 2 september 1909) was e West-Vlamschn architect.

Louis de la Censerie

De familienoame stoat in aktn ook vermeld lik Delacenserie, Delasencerie, Dela Censerie en Dela Sencerie.

Zyn voader Louis Delacenserie was e marchang uut Doornik en loater wast ‘n annemer.

De joungn de la Censerie studeerdege an de Brugsche academie ounder de leidienge van Jean-Brunon Rudd (Brugge, 1792-1870), die van 1830 tout an zyn dôod ook stadsarchitect van Brugge was.

Achter zyn ipleidienge gink Louis de la Censerie in Gent werkn by Louis Roelandt, een architect die een importente plekke ad in de neoklassieke architecteure van België. Zyn êeste ountwerpn van vo 1870 woarn ook klassiek van styl.

In 1862 et ’n de prestigieuze Prys van Rome vo architecteure gewonnen. Je krêeg een reisbeurze vo vier joar vo te goan studeern in ’t buutnland. Je gink noa Parys, Italië en Grieknland.

Je kêerdege ton were noa Brugge en in 1870, achter de dôod van Jean-Brunon Rudd, wierd ’n stadsarchitect. Je blêef die functie uutoefenen tout in 1892. (J’is ton ipgevolgd deur zyn lêerlink Charles De Wulf). Je wierd ook benoemd tout lêroare architecteure an den Academie van Brugge, woa dat ’n directeur wierd in 1889. Je was ook lid van ’t provincioal comité van de Koninklijke Commissie voor Monumenten.

Je speeldege e styve grôte rolle by de restauroatiepolitiek in Brugge en je drukte zyn stempel ip ’t Brugs stadsbeeld van ’t latste quart van de 19ste êeuwe. Tegoare met e poar die van ’t zelfste gedacht woarn lik em makteget ie van Brugge e sôorte van neogotisch museum.

Stadhuus van Brugge

In die neogotische styl restaureerdeget ie verschillige Brugsche gebouwn:

• d’Illig-Bloedbasiliek
• d’ Oude Griffie
• ‘t Tolhuus ip de Jan Van Eyckplatse
• ‘t Gruuthusecomplex (ôost- en zuudvleugels)
• ‘t Stadhuus
• ‘t Sashuus an ‘t Minnewoater
• ‘t Postgebouw ip de Markt
• de Poortersloge
• de westgevel van d’Onze-Lieve-Vrouwekerke

Je voerde ook vele privé en openboare ipdrachtn uut:

• stadhuus van Diksmude
• de normaalschole van Brugge
• Oud Sint-Jan in Brugge
• ‘t Centraal Station van Antwerpn
• de Sint-Petrus-en-Pauluskerke van Ostende
• Kastêel Bloemendale in Beirnem
• een hotel in Brugge - Hotel Heritage

Louis de la Censerie is nôois getrouwd gewist. Je weundege an de Spegelreie 15.

J’is verzekers gestorvn an ‘n infarct (emporté par une crise foudroyante) en je ligt begroavn ip ‘t kerkhof van Assebroeke, vak 34/4.

• 
  Stadhuus van Diksmude
• 
  Centraal Station van Antwerpn
• 
  Sint-Petrus-en-Pauluskerke van Ostende