Jacques-Louis David

Jacques-Louis David (Parys, 30 ogustus 1748 – Brussel, 29 december 1825), was e Fransche kunstschilder van historische schilderien en portreitn. Je wordt anzien lik den êeste Fransche neoclassicist en j' influenceerde vele 19e-êeuwsche Fransche schilders.

Dat artikel es geschreevn in 't Kustwestvlams.

---

Zelfportreit (1794)

David was actief betrokkn by de Fransche Revoluusje en je schilderde monumentale, g'idealiseerde tafereeln noa de gebeurtenissn van in die doagn. Je gerakte bevriend met de revolutionairn Maximilien de Robespierre en Jean-Paul Marat. Je zetelde in de Nationale Convensje in september 1792, os Frankryk was veranderd van e monarchie in e republiek. Je kwam lid van de jacobins, e groep radicale republikeinn en teegnstander van de mêer gemoatigde girondins.

Zyn bekendste werk is De dôod van Marat van oktober 1793, teegnwoordig te bezichtign in de Keunienklike Musea vo Schône Kunstn van België in Brussel. Van 1799 toet 1815 wast ie hofschilder van Napoleong.

Ols êen van d' oendertêeknoars van de dôodstraffe vo keunienk Louis XVI (in januoari 1793) wierd David in 1816 verbann en je weunde vanof ton in Brussel. In 1820 kreegt ie verschillige probleemn mè zyn gezoendheid en da verergerde nog ost ie in 1824, in 't werekêern van de muntschouwburg, omverregereen is deur e koetse. Je schilderde da joar zyn latste mêesterwerk Mars oentwoapend deur Venus, dat deur zyn lêerliengn ofgewerkt is.

Je wierd êest begroavn in de Sint-Michiel en Sint-Goedelekathedroale van Brussel (in ofwachtienge van een eventuele repatriërienge) en loater begroavn ip 't kerkhof van Brussel. 't Herte van David wierd begroavn ip 't beroemd kerkhof Père-Lachaise in Parys.

• 
  Dôod van Marat (1793)
• 
  Napoleong stikt de Grôte St. Bernardpas over (1800)
• 
  Mars oentwoapend deur Venus (1824)

Ofbeeldiengn die ier by passn ku je vien in de categorie Jacques-Louis David van Wikimedia Commons.