E403

De E403, ôok gekend als de A17, is een autostrade die Dôornik me Brugge verbindt. Een belangryk stik dervan lôopt tweis deur West-Vloandern. De autostrade wordt als alternatief gezien om Rysel te vermydn o je van Parys komt. De E403 es angeleid tussen '74 en begun de joarn '90.

Den E403 an de wisseloare met den E40/A10 by Brugge

Traject in West-Vloandern

De E403/A17 komt in Kortryk West-Vloandern binn, mêer bepoald in Oalbeke. J'eindigt in Brugge. Ip z'n deurgang deur de provinsje doet ie verschillnde gemêentn an:

• wisseloare in Oalbeke (Kortryk) mei E17/A14
• ofrit 5: Wevelgem
• wisseloare in Môoslee mei A19 na Yper
• ofrit 6: Yzegem & Rumbeke
• ofrit 7: Roeseloare-Oavn
• ofrit 8: Roeseloare-Bevern
• ofrit 9: Lichtervelde
• ofrit 10: Toeroet (sinsn begun 2004)
• ofrit 11: Ruddervoorde
• wisseloare in Brugge met den E40/A10

En vanof ier goat den E403/A17 over in den Expresweg E403/N31 Brugge-Zeebrugge.

Volledig traject

De E403 is redelik kort, der is nog een kort stikske van Kortryk noa Dôornik

Varia

• In Wevelgem is't er nen tunnil ounder 't vliegpling.
• In Dottenys ei den toenmaligen burgemêester lang verzet angetêkend tegen de deurtrekkinge van de toen nog A17. Doardeure eit er joarn een onbereedn stik geleegn tussen Kortryk en Dôornik.
• Vô West-Vloamingen is de situoatie round Rysel vrêe verwarrend omdat de Fransmans u hêelsan langs Dôornik (E403) willn stuurn vô 't centrum van Rysel t'ontzien. Dat is nen grôotn ommetoer woarda ter em al vele an loatn vangn ein. D'iplossienge is de richtienge Rysel (Lille) en Terkoeje (Tourcoing) volgn tot da je de wyzers noa Gent ziet zounder dat er Brussel ôok by stoat. Dus nôoit de richtienge noa Brussel volgn oa je noa Kortryk of Brugge moet.

Ofbeeldiengn die ier by passn ku je vien in de categorie E403 van Wikimedia Commons.