Kriftachtign

De kriftachtign (Crustacea) vormn e substamme van geleedpôotign mè bekende bêestn lik krabbn, kriftn, geirnoars, pissebeddn en zêepokkn.

Dat artikel es geschreevn in 't Kustwestvlams.

---

Kriftachtign
Geweune eremietkrifte (Pagurus bernhardus)
Taxonomische indêlienge
Ryk: Animalia (Bêestn) Ounderryk: Eumatozoa (Orgoanbêestn) Stamme: Arthropoda (Geleedpôotign)
Substamme
Crustacea Brünnich, 1772

De 67.000 beschreevn sôortn varieern styf in grotte van Stygotantulus stocki 0,1 mm toet de Japaneesche kobbekrabbe met e pôotspanwydte toet 3,8 m. Juste lik andere gelêedpôotign èn kriftachtign een exoskelet die ofgesmeetn wordt by ’t groein (vervelln).

De mêeste kriftachtign leevn vry in ’t woater, moar ook sommigte ip 't land (pissebeddn), sommigte zyn parasitair (visluuzn, toengeworms) en andere zyn sessiel (zêepokkn).

't Lyf van e kriftachtige bestoat uut segmentn, gegroepeerd in drie dêeln: kop, borststik en achterlyf. By vele sôortn zyn de kop- en borstsegmentn vergroeid toet e kopborststik. 't Lyf wordt beschermd deur e stevig pantser.

Classificoasje

• Klasse Branchiopoda (Kieuwpôotkriftjes)
  • Subklasse Phyllopoda (Triops, woatervlôoin)
  • Subklasse Sarsostraca (Pekelkriftjes)
• Klasse Remipedia (Lêerekriftn)
• Klasse Cephalocarida
• Klasse Maxillopoda
  • Subklasse Mystacocarida (styf klêene wormachtige, kriftachtige bêestjes, 1 mm)
  • Subklasse Copepoda (Roeipôotkriftjes)
  • Subklasse Branchiura (Visluuzn)
  • Subklasse Pentastomida (Toengeworms, parasitaire kriftachtign)
  • Subklasse Tantulocarida (parasitaire kriftachtign)
  • Subklasse Thecostraca (woaroender de zêepokkn)
• Klasse Ostracoda (Musselkriftjes)
  • Subklasse Myodocopa
  • Subklasse Podocopa
• Klasse Malacostraca (Superieure kriftachtign)
  • Subklasse Phyllocarida
  • Subklasse Hoplocarida
  • Subklasse Eumalacostraca (Geirnoars, krabbn, langoestn)

Ofbeeldiengn die ier by passn ku je vien in de categorie Crustacea van Wikimedia Commons.