Pepeyn van Italië

Pepeyn van Italië (geboortenoame Karloman), (773/777 - 8 juli 810) was de derde zeune van Karel de Grôotn. Je was keunienk van Italië ounder ’t gezag van zyn voader. Zyn moeder was Karels twidde wettelyke vrouwe Hildegard van Vintzgau.

Pepeyn van Italië

773/777- 810
Keunienk van Italië
Periode 781-810 Vôorganger Karel de Grôotn Ipvolger Bernard van Italië
Voader Karel de Grôotn Moeder Hildegard van Vintzgau

Mè zyn êeste vrouwe Himiltrude ha Karel de Grôotn gin wettelyk huwelyk. Ze was zyn concubine en met heur had 'n e dochter Amaudru en e zeune Pepeyn. Je zetteg heur an de kant vo te kunn trouwn me de Langobardische prinsesse Desiderata.

Zyn oudste zeune Pepeyn met de Bulte kwam nie in anmerkienge vo d’erfipvolgienge en in 780 ounterfde Karel de Grôotn hem officieel. Je liet de noame van Karloman in Pepeyn verandern, omda Pepeyn e belangryke noame was in de Karolingische dynastie.

Keunienk van Italië

Karel de Grôotn was keunienk van de Langobardn (of Lombardn) van 774. In 781 bezocht ‘n ’t gebied vor orde ip zoakn te stelln en ’t land ounder Karolingisch gezag te briengn. Je stelde zyn zeune Karloman an ols keunienk van Italië. Karloman wierd de 15stn april 781 deur paus Adrianus I gekrôond me d’yzere Lombardische krône en zyn noame wierd veranderd in Pepeyn. Je vestigdeg hem in Pavia, den hoofdstad van Lombardye.

Vrouwe en jounges

Je trouwde me Bertha, dochter van de groaf van Toulouse en z’han vuuf dochters:

• Adelaide, trouwde me Lambert I van Nantes. Hunder zeune Guido I van Spoleto was de voader van Guido van Spoleto, keunienk van Italië en keizer van ‘t Rôoms Ryk.
• Atala
• Gundrada
• Bertha
• Tetrada,

J’had ook ’n ounwettige zeune Bernard.

Divisio Regnorum

Met de Divisio Regnorum regelde Karel de Grôotn in 806 de verdêlienge van zyn ryk, vor achter zyn dôod. Pepeyn zou neffest de gebiedn van Italië ook stikkn van Beiern, Karinthië en den helt van Alemannië krygn, mo ’t kwam nie zo verre, want je stierf in juli 810. Olhoewel da zyn zeune Bernard ounwettig was mocht ’n van Karel de Grôotn zyn voader ipvolgn in Italië. Pepeyns oudere broere Karel de Joungern stierf in 811 en doarom erfde zyn joungere broere Lodewyk de Vroomn ’t Frankisch Ryk.