Judith, êeste Gravinne van Vloandern

Judith van West-Francie (geboren ca. 844 en gestorven in 870) was d'êeste gravinne van Vloandern.

Dat artikel es geschreevn in 't Brugs.

---

Judith van West-Francië

844 - 870
Gravinne van Vloandern
Periode 863 - 870 Vôorganger - Ipvolger Ælfthryth van Wessex
Keuniginne van Wessex, Ingeland
Periode 856 – 860 Vôorganger Osburga Ipvolger Wulfrida
Voader Karel den Kletsn Moeder Ermentrude van Orléans

Leevn

Judith was 'n dochtere van Karel den Kletsn, de keunink van West-Francië. Os ze twolf joar oet was, den eerstn oktober van 't joar 856, wier ze getrouwd me den Iengelsen keunink, Aethelwulf van Wessex. Achter dat ie in 858 z'n keirse uutgebloazen aad, most ze trouwen met ur stiefzeune, Aethelbald van Wessex, een zeune van Aethelwulf uut 't êeste bedde en die ook keunink van Iengeland wier. Moa je gienkt ie ook dood en ze kwaam zy ip ur zeventienste ton moa were noa Vrankryk.

In ofwachtienge van een volgende trouwkandidoat platste ur voader ur ounder toezicht van den bisschop van Senlis.

Ols Boudewyn I van Vloandern, loater genoemd met den Yzern Oarm, ur uut Senlis ontvoerdige tegen Kestdag 861, liet ur voader z'olle twee in den ban van de kerke sloan.

Ze vluchtigen êest noa Lotharingn en loater zelfs noa Rôme. Do leien ze under gevol uut an de paus Nikolaas I die een brief schreef noar ur voader Karel de Kletsn. Da kwam ton nog t'ope met een dreigement van Boudewyn dat ie wel e kêe zoe kunnen t'ope doen me de Vikings die de noordzeekust bedreigdegen. Woar ip dat Koarel liet weetn dat ie nie kost weerstoan an de dringende vrage van de paus dat ie zoud and over erte geleid èn.

Den dertiensten december 863 trouwdige Judith mè Boudewyn en kreeg ze ols trouwcadeau van ur voader de Pagus Flandrensis of anders gezeid 't Groafschap Vloandern. Boudewyn I met den Yzern Oarm wordt doarom anzien ols den êesten graaf van 't Graafschap en dank zy Judith kostn de Vlaamsche graven toe in de 12ste eeuwe stoefn ip under Karolingische ofkomst.

Judith van West-Francië en Boudewyn met den Yzern Oarm aan t'ope vier kienders: Karel, Boudewyn, Gunhilda en Rudolf. 't Êeste is jounk gestorvn, mo de drie andere en 't verre geschipt.