![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/a/a1/Blankenberge_-_Huisje_van_Majutte_1.jpg/640px-Blankenberge_-_Huisje_van_Majutte_1.jpg&w=640&q=50)
Uzetje van Majutte
From Wikipedia, the free encyclopedia
’t Uzetje van Majutte is één van de wèinige overgebleevn restantn van ’t visschersleevn in Blanknberge.
![Thumb image](http://upload.wikimedia.org/wikipedia/commons/thumb/a/a1/Blankenberge_-_Huisje_van_Majutte_1.jpg/640px-Blankenberge_-_Huisje_van_Majutte_1.jpg)
![Thumb image](http://upload.wikimedia.org/wikipedia/commons/thumb/9/9d/Bij_Majutte_2.jpg/640px-Bij_Majutte_2.jpg)
De Breydelstroate in Blanknberge was tout in ’t joar 1900 bykan allêne beweund deur visschersmenoages me styf vele joungers. In dien tyd wast er e visschersgemêenschap me 66 van die klêne uzetjes en twee cafeetjes. ‘t Stratje gaf uut ip e dune. De beweuners van die visschersuzetjes weundn styf dichte by under platbodemschuutn, die ip ‘t strange wierdn getrokkn.
Van ‘t visschersleevn van vroeger getuugn nog twee geklasseerde uzetjes: ‘t schilderachtig Uzetje van Majutte met z’n wit puntgeveltje ip numero 10 en 't twidde uzetje ip numero 27.
’t Uzetje van Majutte et een oundiepe funderinge, drie stêens diepe in ‘t dunezand. Je moe je kop stuupn vo deur de dubbele koeiestaldeure binn te geroakn. In de balkn zie je overal scheepswerk. E boogveistertje gaf vroeger uutzicht ip de duunn. In ’t voorplatstje ist er e schouwe met Delftse tiggels. In den eird stoat er een oude inscriptie met de spreuke: "Maeghere Cuecken en Herten Blye". De vloer is beleid me klêne rôodgebakkn tiggels. In ‘t keukentje ist er e twiddn open eird me were e grôte schouwe en een oude roundgemetste "pekelpit" ofgeslootn met e deksel in out. In de balkn boovn de keukn zit er e planke van e Blanknbergsche schute verwerkt, die verzekers is angespoeld. Ounder ’t dek van Boomsche pannen ist er e gebinte in out en e grôte zolder.
Niemand wit juste oe oud da ’t uzetje is. ‘t Is vele generoaties lange beweund gewist deur de visschersfamilie Debruyne, met de lapnoame de "Majuttes". De latste visscher die d’r weunde was Jan Majutte.