![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/c/cf/Blason_fr_Hainaut_ancien.svg/langvls-640px-Blason_fr_Hainaut_ancien.svg.png&w=640&q=50)
Huus Reginar
From Wikipedia, the free encyclopedia
't Huus Reginar, ook de Reiniers genoemd, was e belangryke oadellyke familie in Lotharingen binst de 10e êeuwe, den tyd van de Karoliengers en 't Saksisch Huus van de Liudolfiengers. Ze woarn d'êeste dynastie van 't groafschap Henegouwn.
![Thumb image](http://upload.wikimedia.org/wikipedia/commons/thumb/c/cf/Blason_fr_Hainaut_ancien.svg/320px-Blason_fr_Hainaut_ancien.svg.png)
De Reginars hen lange gevochtn teegn de Konradyners vo de macht in Lotharingen, en achter den dôod van Lodewyk et Kiend in 911, verkoozn ze Karel de Simpeln ols keunienk van Lotharingen in de plekke van Konrad I, die wel verkoozn was in Ôost-Francië.
Van de Reginars kwoamn ook de groavn van Leuven en Brussel vôort, loater d'hertoogn van Broabant.
De Reginars stamdn of van de Karoliengers. De stamvoader, Giselbert van de Moasgouwe, ountvoerde Ermengarde, dochter van Lotharius I. Under zeune, Reginar I was den êeste groaf van Henegouwn. Je was de roadgever van keunienk Zwentibold en van 910 tout 915 hertog van Lotharingen. Zyn zeuns woarn Giselbert, hertog van Lotharingen, en Reginar II, groaf van Henegouwn.
Reginar III, zeune van Reginar II, revolteerde teegn keizer Otto I. Je verzetteg hem teegn d'anstellienge van d'hertoogn Konrad de Rôoin en Bruno de Grôotn van Lotharingen. Reginar III wierd ofgezet deur de keizer en verbann no Boheemn, woa dat 'n gestorvn is. Je was getrouwd met Adela van Leuven en under zeuns woarn Reinier IV van Henegouwn en Lambert I van Leuven, den êeste groaf van Leuven en stamvoader van de Leuvensche groavendynastie.
Van 1183 kwoamn de titels groaf van Leuven en Brussel, en landgroaf van Broabant ounder den titel hertog van Broabant.
Dien titel is gecreëerd gewist deur keizer Frederik Barbarossa van 't Hillig Rôoms Ryk. Je promoveerde Hendrik I, zeune van Godfried III van Leuven, die groaf van Leuven, landgroaf van Broabant, markgroaf van Antwerpn en hertog van Neder-Lotharingen was, tout êestn hertog van Broabant.