Adela van Mêesn

Adela van Mêesn (°Vrankryk 1009 - Mêesn 8 januoari 1079), ouk gekend lik Adela van Vrankryk of Adela Capet. Adela wos e dochter van Robert II, e keunienk va Vrankryk, en Constance van Arles.

Dit artikel es geschreevn in 't Mêesns, en da zou best ozô bluuvn.

---

Adela van Mêesn

1009 - 1079
Adela van Mêesn met eur vint Boudewyn
Gravinne van Vloandern
Periode 1035 - 1067 Vôorganger Eleonora van Normandië Ipvolger Richilde van Henegouwn
Voader Robert II van Vrankryk Moeder Constance van Arles

Neur leevn

Ze wos êest getrouwd mi ertog Richard III van Normandië. Achter zyn dôod is ze in 1028 ertrouwd me groaf Boudewyn V van Vloandern. Tope me nem a ze 4 joens: Boudewyn VI, Mathilda van Vloandern (die trouwde me Willem den Veroveroare), Robrecht I van Vloandern en Hendrik van Vloandern.

Toen da Boudewyn V van Vloandern dôod wos in 1067, gynk Adela na d'abdy va Mêesn. In 1057 adde ze doa e klôoster (in de orde va Sint-Benedictus) gesticht voe Fransche edeldames.

De legende van Adela

Toen da Adela in Mêesn kwam weunn, krêeg ze van Willem van Mêesn, patriarch van Jeruzalem, e stiktje out van 't kruus woa da Jezus van Nazareth a gestorven wos. Op e nacht krêeg Adela e visioen. E vrouwe vroeg neur om e procesje te doen mi die relikwie. Adela stoug op, en ze vounk e rôon droad op 't altaar in de kerke. Op neur kniejn en elleboogn voogde ze dien droad, en neur volgeliengn markeernde de route da ze dei.

Achter neurn dôod

• Adela is loater van tyd zoalig verkloard. Neurn fêestdag volt op 24 februoari. Ounder de Sint-Nikloajkerke in Mêesn, in de Romaanse crypte, legt er e gedenkploate ter êre van Adela.
• De legende van Adela wos 't begun van 'n Grôotn Kêer, e processje die nu nog ossan in Mêesn bestoat. Ze begunt op 'n dag van de Eilige Kruusvereffieng (14 september) en deurt neegn doagn. In 2007 woarn d'r 613 wandeloars.