From Wikipedia, the free encyclopedia
Kitajan kel' (suližen paginan ičeze nimituz: verol. 漢語 / kebn. 汉语 hanjui, pin'jin': hànyǔ «Han'(-rahvahan) kel'»; kirjutandpaginan ičeze nimituz: 中文 čžunven' , pin'jin': zhōngwén «kitajan kirjkel'») om valdkundkel' Kitaiš, Singapuran i ÜRO:n üks' oficialižiš kelišpäi. Se om sino-tibetižen kel'kanzan üks' kahtes sarakospäi, Kitain rahvahan kel'.
Pagižijoiden lugu kaikes mirus om läz 1,3 mlrd ristituid (2016). Erištadas paginoiden 10 gruppad, pohjoižed paginad oma literaturižen kelen aluseks.
Kitajan kel' om üks' kaikiš amuižiš eläbiš kelišpäi. Sen kirjkel' om kaikiš amuižemb kävutadud keskes nügüd'aigan. Japonan i korejan keled ottas kävutamižhe kitajan kirjkelen ijeroglifoid. Kel'korpusan kaikiš vanhembad dokumentad oma 14.-11. voz'sadoiden EME arboindkirjutesed todud andaks živatoiden luil i katussamboiden katusil.
Normativine kitajan kel' om erazvuitte valdkundoidme da specialižidme territorijoidme, no erinend om pen' niiden keskes. Kitajan norm nimitase 普通话 putunhua, Singapuran — 华语 huajui. Honkongan i Taivanin norm om 国语 gojui, se kävutab veroližid ijeroglifoid.
Voib lugeda ijeroglifad erazvuiččikš sen sijadusen tekstas mödhe. Teta koume tuhad ijeroglifoid om täudub el'gendamha lugendlehtesid i aiglehtesid specializacijata. Ijeroglifoiden üläühthine vajehnik (中華字海 Čžunhua czihai «kitajan ijeroglifoiden meri») mülütab 85 568 ijeroglifad vn 1994 pästandas.
Znamoičend | Järgeline ijeroglif |
Finansižiš dokumentoiš |
pin'jin' | vepsän kirjamil |
---|---|---|---|---|
0 | 〇 | 零 | líng | lin |
1 | 一 | 壹 | yī | ji |
2 | 二 | verol. 貳, kebn. 贰 |
èr | er |
3 | 三 | 叁 | sān | san' |
4 | 四 | 肆 | sì | si |
5 | 五 | 伍 | wǔ | vu |
6 | 六 | verol. 陸, kebn. 陆 |
liù | lü |
7 | 七 | 柒 | qī | ci |
8 | 八 | 捌 | bā | ba |
9 | 九 | 玖 | jiǔ | czü |
10 | 十 | 拾 | shí | ši |
20 | 廿 | 念 | niàn | nän' |
30 | 卅 | 叁拾 | sà | sa |
100 | 百 | 佰 | bǎi | bai |
1000 | 千 | 仟 | qiān | cän' |