From Wikipedia, the free encyclopedia
Tihvin (ven.: Ти́хвин) om Venäman lidn Leningradan agjas. Se om Tihvinan rajonan da lidnkundan administrativine keskuz da üks'jäine lidn. Vn 2010 4. päiväspäi kül'mkud om sodahoštusen lidn-arvnimenke.
Lidnanznam![]() | Flag![]() |
Valdkund | Venäma |
Eläjiden lugu (2023) | 54,286 ristitud |
Pind | 25,4 km² |
![]() | |
Pämez' | Aleksandr Lazarevič (2014—) |
Telefonkod | +7−81 367-xx-xxx |
Avtokod | 47 |
Aigvö | UTC+3 (MSK+0) |
Eländpunkt mainitase ezmäižen kerdan Uz'lidnan koumandes aigkirjas vl 1383 kuti Tihvinan pagast (ven.: Тихвинский Пречистенский погост), om nimitadud jogen mödhe (nüg. Tihvink, ven.: Тихвинка, suom.: Tihvinänjoki). Vl 1560 kahten jumalankodin aluz om pandud jogen vastrandoil — mehiden i naižiden täht. Nened jumalakodid abutiba küksta ročilaižid anastajid 17. voz'sadan augotišes.
Posad sai lidnan statusad vl 1773 kuti Uz'lidnan gubernijan Tihvinan makundan keskuz. Vozil 1918−1927 Tihvin makundanke mülüi Čerepovecan gubernijha.
Tihvinan ižandusen päsarakod oma transportmašinoidensauvomine (vagonoiden tehmine[1]), mechimii (kosmetik[2]), meblin tehmine (IKEA:n fabrik), omblendtegimišt, sömtegimišt.
Lidn sijadase Tihvink-jogen mougotil randoil (Ladogan bassein), 50 m ü.m.t. keskmäižel korktusel. Matkad Piterišpäi om 183 kilometrad päivnouzmha orhal vai 219 km avtotedme, vai 192 km ezilidnelektrojonusel.
Klimat om ven kontinentaline. Voden keskmäine lämuz om +4,8 C° (kahten gradusan madalamb mi Piteriš), kezakun-elokun +15..+18 C°, tal'vkun-uhokun −5..−7 C°. Ekstremumad oma −50,9 C° i +37,8 C°. Paneb sadegid 765 mm vodes, enamba kezakus-elokus (79..85 mm kus) i redukus-kül'mkus (70 mm kus), vähemba elokus-sulakus (42..43 mm kus).
Kaik 19 žilod da küläd mülüdas lidnankundha Tihvinan ližaks.
Tihvinan rajonan administracii tegeb Tihvinan lidnankundan radonoigendajan tobmuden velgusidme vn 2014 21. päiväspäi elokud. Ičeze Deputatoiden Nevondkund om lidnankundas, sen 22 ezitajad oma valitud vn 2019 8. päiväl sügüz'kud.
Vn 2010 Venäman rahvahanlugemižen mödhe lidnan eläjiden lugu oli 58 459 ristitud, lidnankundan — 60 675 ristitud. Kaik 57 900 eläjad oli lidnas vl 2017. Kaikiš suremb lidnan ristitišt oli 72 tuhad eläjid vl 1992. Tihvinan rajonan ristitišton läz nell' videndest eläb Tihvinas.
Vn 2002 kaiken Venäman rahvahanlugemižen mödhe 85 vepsläšt elädas lidnas, vl 2010 — 57 vepsläšt[3].
Ortodoksižen hristanuskondan 18 pühäpertid[4] oma kaičenus i saudud lidnas: Spasan Toižetamižen kafedraline päjumalanpert', Jumalanmaman Emäganpäivän mez'jumalankodi (päjumalanpert', kuz' jumalanpertid, časoun'), Jumalanmaman Tulendan Pühäpertihe jumalankodi (ühtennimine päjumalanpert' i kaks' jumalanpertid), nell' jumalanpertid i koume časounäd. Niiden ližaks, ph. Mikulai-čudonsädajan Besednii jumalankodi (päjumalanpert', jumalanpert') i kaks' časounäd ei ole kaičenus.
Tihvinan tegimištoliž-tehnologine tehnikum[5] i Leningradan agjan medicinižen profšingotesen keskusen filial oma lidnan professionaližen opendusen aluzkundoikš.
Avtobusad oma kundaližeks transportaks lidnas.
Tihvin-raudtestancii radab vspäi 1904 «Piter — Babajevo»-keskustal. «Uz' Ladog — Vologd»-avtote ümbärdab lidnad pohjoižpolespäi.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.