Nojabr'sk
From Wikipedia, the free encyclopedia
From Wikipedia, the free encyclopedia
Nojabr'sk (ven.: Ноябрьск [nɐˈjabrʲsk], tot.: Ноябрьск, ukr.: Ноябрськ, nenc.: Нюдя Пэвдей марˮ, sijaline nenc.: Нюча пэ”дя”й марˮ) om Venäman lidn da lidnümbrik Jamalan Nenciden avtonomižen ümbrikon suviröunanno. Se om ümbrikon kahtenz' lidn eläjiden lugun mödhe, om ümbärtud Puran rajonan territorijal.
Lidnanznam![]() | Flag![]() |
Valdkund | Venäma |
Eläjiden lugu (2021) | 100,188 ristitud |
Pind | 38,84 km² |
![]() | |
Pämez' | Aleksei Romanov (keväz'ku 2016—) |
Telefonkod | +7−3496-xxx-xxx |
Avtokod | 89 |
Aigvö | UTC+5 (MSK+2) |
1975. voz' lugetas lidnan oficialižen alusenpanendan vodeks, sen voden sulakul ezmäine desant ištutihe Itujah-jogen (ven.: Итуяха) jäle otmaha Holmogoran kivivoin löudmižsijad kävutamižhe. Zavottihe eländpunktan i Nojabr'skai-raudtestancijan sauvondad vn 1976 kül'mkus (ven. ноябрь) kuti kivivoin samižen radnikoiden žilo. Nimitihe Nojabr'skii-žiloks sauvomižen zavodindan kun mödhe. Vn 1978 lopus lendimport (NOJ / USRO / НОЯ, 233 tuh. passažiroid vl 2022) radaškanzi kahesas kilometras päivlaskmha lidnaspäi. Žilo sai lidnan statusad nügüdläiženke nimenke vn 1982 28. päiväl sulakud.
Nojabr'sk šingotase kivivoin da sen gazan samižel («Gazprom») i Vingapuran gazanümbriradajal tegimel («SiburTümen'Gaz»), kivivoikompanijoiden holitusen edheotandoil i sauvondkompanijoil, Nojabr'skan purugazelektrostancijal, maižanduzkompleksal i sömtegimištol (leibän i pol'fabrikatoiden tehmine, veden pakuitez).
Lidn sijadase Nankpöh-jogen randoil (ven.: Нанкпёх 32 km pitte, vanh. Pösl'-Nan Пёсль-Нана, Pur-jogen bassein), 115 m ü.m.t. keskmäižel korktusel, Obin i Puran vezijagandanno. Om taigad i penid järvid lidnan ümbrištos, kaikiš suremb om Tetu-Mamontotäi-järv (31 km²) kahesas kilometras suvipäivnouzmha. Matkad Hantin da Mansin avtonomižen ümbrikon röunhasai om kümne kilometrad suvhe, Salehardhasai om 557 km lodeheze orhal vai 1140 km avtotedme. Lähembaižed lidnad oma Muravlenko 80 km lodeheze orhal vai 119 km avtol, i Kogalim (Hantin da Mansin avtonomine ümbrik) 120 km suvhe orhal, raudtedme i avtotedme.
Klimat om ven subarktižen i teravan kontinentaližen röunal. Voden keskmäine lämuz om −3,4 C°, kezakun-elokun +12..+16 C°, tal'vkun-uhokun −18..−23 C°. Ekstremumad oma −55 C° i +34 C°. Paneb sadegid 623 mm vodes, enamba kezakus-redukus (63..87 mm kus), vähemba vilukus-uhokus (29..31 mm kus).
Nojabr'sk om lidnümbrikon üks'jäižeks eländpunktaks. Se kogoneb znamoitud projektirujil mikrorajonišpäi (oz., Д-1, И-2, Ц-1, Е, К) i edahaižes Vingapurovskii-mikrorajonaspäi (žilo edel 2004. vot, 80 km päivnouzmha avtotedme pidust' ümbrikoiden röunad). Lidnümbrikon pind — 189,05 km².
Vn 2010 kaiken Venäman rahvahanlugemižen mödhe lidnan eläjiden lugu oli 110 620 ristitud, se oli kaikiš suremb lidnan ristitišt. Kaik 106 879 eläjad oli lidnas vl 2017.
Rahvahad (enamba 0,4 % vl 2010): venälaižed — 65,5 %, ukrainalaižed — 12,3 %, totarlaižed — 6,7 %, azerbaidžanlaižed — 2,9 %, baškiralaižed — 2,3 %, vaugedvenälaižed — 1,5 %, moldovalaižed — 1,1 %, lezgilaižed — 0,6 %, čuvašalaižed — 0,6 %, uzbekad — 0,5 %, tadžikalaižed — 0,4 %, čečenalaižed — 0,4 %, kirgizlaižed — 0,4 %, kumikad — 0,4 %, toižed rahvahad — 3,4 %, rahvahuden ozutandata — 1,0 %.
Ortodoksižen hristanuskondan nell' jumalanpertid[1] oma saudud lidnas. Baptizman pühäpert' om letud. Islaman pämečet' om avaitud vspäi 2004.
Professionaližen opendusen aluzkundad oma Nojabr'skan professionaližiden da informacižiden tehnologijoiden kolledž[2], Jamalan äiprofil'žen kolledžan (Salehard) filial, Nojabr'skan gumanitariž-ekologine institut (Tümenin valdkundaližen universitetan filial) i Nojabr'skan kivivoin da gazan institut Viktor Gorodilovan nimed (Tümenin industrialižen universitetan filial), mugažo üläopendusen nell' filialad (Moskv, Tomsk, Novosibirsk, Jekaterinburg). Kaik viž sportkompleksad ratas lidnas.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.