From Wikipedia, the free encyclopedia
Laris (grek.: Λάρισα [ˈlarisa] Lárisa) om lidn Grekanman pohjoižes. Se om valdkundan videnz' lidn eläjiden lugun mödhe, Laris-kundan keskuz da päpala, Fessalii-agjan (periferijan, om sätud vl 1987) administrativine keskuz da kaikiš suremb lidn.
Valdkund | Grekanma |
Eläjiden lugu (2021) | 148,562 ristitud |
Pind | 88,17 km² |
![]() | |
Pämez' | Apostolos Kalogiannis (sügüz'ku 2014—, Απόστολος Καλογιάννης) |
Telefonkod | +30−2410 |
Aigvö | tal'vel UTC+2, kezal UTC+3 |
Eländpunkt om olmas amussai, enamba nelläd tuhad vozid erasiden-se andmusiden mödhe. Laris oli Fessalii-agjan ohjandusen faktižeks keskuseks 8. voz'sadaspäi EME. Fessalijan ohjandajad paniba Pifijan vändoiden alust i pid'oiteliba niid. Vl 197 EME rimalaižed anastiba lidnad. Sen kaks' antikaigašt teatrad (3. voz'sada i 1. voz'sada EME) i keskaigaine lidnuz oma kaičenus paloin.
Vn 1941 keväz'kun 1. päiväl manrehkaiduz 6,3 magnitudanke tegihe i mureni läz kut tuhad pertid (nell' sauvust videspäi), no lidn oli alustunu bombardiruindale Italijan aviacijal vn 1940 tal'vkuspäi, ka ristitišt okai lidnad, i pölištuiba 40 ristitud manrehkaidusespäi.
Laris šingotase sömtegimištol kazvateližen Fessalijan tazangišton torhudel, bumagan, tekstilin i sauvondmaterialiden pästandal. Znamasižed edheotandad oma Biokarpet (kourad) i Orient Bikes (velosipedad).
Lidn sijadase agjan keskuzpalas, 40 km päivlaskmha i suvipäivlaskmha Egeižen meren randhasai, 67 m ü.m.t. keskmäižel korktusel. Olimp-mägi om 40 km pohjoižhe. Matkad Afinad-pälidnhasai om 210 km suvipäivnouzmha, Salonikihesai om 120 km pohjoižpäivnouzmha. Laris-raudtestancii radab Pirei — Salonikid-keskustal.
Klimat om kontinentaline pol'kuiv Keskmeren pirdoidenke. Voden keskmäine lämuz om +15 C°, kezakun-elokun +24..+27 C°, tal'vkun-uhokun +5..+7 C°. Ekstremumad oma −21,6 C° i +45,5 C°. Paneb sadegid 413 mm vodes, enamba kül'mkus-tal'vkus (52..67 mm kus), vähemba kezakus-sügüz'kus (13..23 mm kus).
Vn 2011 Grekanman rahvahanlugemižen mödhe lidnan ristitišt oli 144 651 eläjad, Laris-kundan 162 591 eläjad 336 km² pindal, vl 2001 — 131 095 eläjad lidnas i 145 981 eläjad kaikes kundas. Kaik 164 381 ristitud elihe lidnankundas vl 2021. Kaikiš suremb lidnan i kundan ristitišt om nügüd'. Kaik 269 151 ristitud elädas lidnaglomeracijas (2021, regionaline ühtnik).
![]() |
Laris (lidn) Vikiaitas |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.